Քաղաքականություն
12.10.2024 | 19:00«Նկարիչների միությունը պարզապես գույք, հասցե, տարածք չէ, այն ունի պատմություն, մշակութային արժեք: Չկա կոնկրետ ընթացակարգ` պետականացումից հետո ինչ է լինելու, ինչպես է տնօրինվելու միությունների գույքը: Ընդ որում՝ մեզ պատկանող շենքերը երբեք պետությանը չեն պատկանել»,- Factor TV-ի հետ զրույցում նշում է Հայաստանի նկարիչների միության նախագահ Սուրեն Սաֆարյանը` անդրադառնալով դեռևս մարտին բարձրացած աղմուկին ստեղծագործական միությունների շենքերի պետականացման հետ կապված: Չնայած Դատախազության նախաձեռնության դեմ բողոքին՝ այս հարցը վերջերս Ազգային Ժողովում կրկին բերվեց օրակարգ:
«Մենք սեփականազրկվում ենք, այս խնդիրը պետք է օր առաջ լուծում ստանա, մինչև դա չլինի, մենք չենք հանգստանա: Միությունը վերջին տարիներին ինչ-որ չափով ոտքի էր կանգնեցրել, իսկ այս խնդիրը խանգարում է մեզ, ամեն ծրագիր կանգ է առել, անորոշություն է: Իսկ ի՞նչ երաշխիք կա, որ ստեղծագործական միությունների շենքերի պետականացումից հետո հաջորդ իշխանությունը չի գա ու չի ասի` պետական սեփականություն է, ազատեք տարածքը»,-շեշտում է Սուրեն Սաֆարյանը:
Նա անդրադառնում է ոլորտի այլ խնդիրների ևս: Սաֆարյանի խոսքով` անհրաժեշտ է օրինագիծ, որով ստեղծագործական միությունները կառանձնանան այլ միություններից ու ՀԿ-ներից. «Այդ դեպքում նոր նկարիչները կունենան ստաժ, բժշկական ապահովագրություն և այլն»:
Սուրեն Սաֆարյանը ընդգծում է` այսօր նկարիչների արվեստանոցները հարկվում են արհեստանոցների նման`որպես հասարակական օբյեկտ. «Բայց մենք արտադրող չենք, մենք ստեղծագործող ենք, մենք նրբերշիկի արտադրամաս չենք: Արվեստանոցների գույքահարկի դրույքաչափը պետք է նվազեցնել: Նկարիչը ամեն օր արտադրանք չի տալիս. նա կարող է, օրինակ, աշխատել մեկ տարի և որևէ կտավ չվճառել»:
Թե որքանով են նկարիչներն այսօր Հայաստանում մտավորական ակտիվ խավ, Սաֆարյանը պատասխանում է. «Մտավորականի կարծիքը միայն ցույցերին չէ, որ պետք է լսել, դա արդար չէ: Խաղաղ ժամանակ ևս նա ունի իր ձայնի լսելիության անհրաժեշտություն»:
Մանրամասները`տեսանյութում:
Աննա Բաբաջանյան
