15.12.2025 | 15:43
ՀՀ ԱԳ նախարարի տեղակալը հանդիպել է ՄԱԿ-ի Քաղաքակրթությունների դաշինքի բարձր ներկայացուցչի հետ
ՔՊ-ում արդարադատության նախարարի երեք թեկնածուի անուն է քննարկվել․ մեծ են Արփի Դավոյանի շանսերը
Քաղաքականություն
02.10.2024 | 00:15
Այսօր տեղի ունեցած «Քաղաքացիական պայմանագիր» կուսակցության վարչության նիստում քննարկվել են արդարադատության նախարարի թեկնածություններ: Այս մասին հայտնում է կուսակցության ֆեյսբուքյան էջը։ Նիստը վարել է վարչապետ, կուսակցության նախագահ Նիկոլ Փաշինյանը։
Factor.am-ին մանրամասներ են հայտնի դարձել փակ քննարկումից։ Մասնավորապես, Factor.am-ին ՔՊ-ի առանցքային դեմքերից մեկը փոխանցեց, որ նախարարի երեք թեկնածու է քննարկվել։ Պաշտպանության նախարար Սուրեն Պապիկյանն առաջարկել է ԱԺ պետաիրավական հարցերի հանձնաժողովի նախագահ Վլադիմիր Վարդանյանի թեկնածությունը, ՔՊ փոխնախագահ Վահագն Ալեքսանյանն առաջարկել է ԱԺ պատգամավոր Արուսյակ Ջուլհակյանի թեկնածությունը, իսկ ԱԺ նախագահ Ալեն Սիմոնյանը՝ պատգամավոր Արփի Դավոյանի թեկնածությունը։ Factor.am-ի աղբյուրի փոխանցմամբ՝ Ալեն Սիմոնյանի առաջարկից հետո Ալեքսանյանն ու Պապիկյանը իրենց առաջադրած թեկնածուներին չեղարկել են՝ նշելով, որ աջակցում են Սիմոնյանի առաջարկած թեկնածուին։
Վերջնական որոշում, սակայն, ՔՊ-ականները չեն կայացրել։ ՔՊԿ վարչության հաջորդ նիստին՝ մյուս երեքշաբթի, Արփի Դավոյանի թեկնածության հարցը կդնեն քվեարկության, եթե մեծամասնությունը կողմ լինի, նա կնշանակվի նախարար։
Թեմայի շուրջ Factor.am-ը մեկնաբանություն խնդրեց ՔՊԿ վարչության փոխնախագահ Վահանգն Ալեքսանյանից։ Նա առանց մասնավորեցնելու նշեց, որ տեղեկատվության որոշ մասը համապատասխանում է իրականությանը, իսկ մի մասը չի համապատասխանում։ Հստակեցնող հարցին՝ արդյո՞ք ինքը, օրինակ, առաջադրել է Արուսյակ Ջուլհակյանի թեկնածությունը, Ալեքսանյանը հրաժարվեց պատասխանել՝ նշելով, որ պաշտոնական հաղորդագրությունից զատ մամուլի համար այլ տեղեկություն չեն տրամադրում։ «Ինչ-որ մի մասը հերքելը՝ նշանակում է ինչ-որ մի մասը հաստատել, իսկ դա էթիկական նորմերի խախտում է, հակասում է մեր վարչության նիստերի խորհրդապահական ռեժիմին»,- ասաց իշխող ուժի ներկայացուցիչը։
Հիշեցնենք, որ Արդարադատության նախարար Գրիգոր Մինասյանը հոկտեմբերի 1-ին ազատման դիմում է ներկայացրել։ ՔՊ-ական պատգամավորները, որոնց թվում են Արփի Դավոյանը, Անդրանիկ Քոչարյանը, Լուսինե Բադալյանը նախորդ շաբաթ ստորագրահավաք էին սկսել Մինասյանին հեռացնելու հարցով։ Ստորագրահավաքին միացել էր նաև պատգամավոր Արսեն Թորոսյանը, ընդհանուր 27 պատգամավոր։
Պատգամավորների հիմնավորումն այն է, որ քաղաքացիները բողոքում են արդարադատության ոլորտում առակա խնդիրներից։ Արփի Դավոյանն էլ իր հերթին հայտարարել է, որ նախարարը պետք է լինի ՔՊԿ անդամ։ Նշենք, որ Դավոյանը կուսակցական է։
Նարեկ Կիրակոսյան
