Չինաստանում նորագույն միջուկային սուզանավ է խորտակվել

Չինաստանում Չժոու դասի նորագույն միջուկային սուզանավ է խորտակվել․ դա տեղի է ունեցել Ուհան քաղաքի մոտ գտնվող նավաշինարանում, աղբյուրները հայտնել են The Wall Street Journal-ին, Reuters-ին և AP-ին:  Թեև դեպքը տեղի է ունեցել մայիսի վերջին կամ հունիսի սկզբին, այդ մասին նոր է հայտնի դառնում։

Պարբերականի զրուցակիցների խոսքով՝ սուզանավը վերջին անգամ տեսել են մայիսի վերջին Յանցզի գետի նավամատույցում, որտեղ այն սարքավորվում էր մինչև ծով դուրս գալը։ Վթարի պատճառների մասին տեղեկություններ չկան։ Հայտնի չէ նաև միջադեպի հետևանքով զոհերի և վիրավորների մասին։

Planet Labs-ի կողմից արված արբանյակային լուսանկարների համաձայն՝ կռունկները խորտակման վայր են ժամանել հուլիսի սկզբին՝ սուզանավը գետի հատակից բարձրացնելու համար: Հայտնի չէ, թե արդյոք խորտակման պահին նավը միջուկային վառելիք է տեղափոխել,թե ոչ, սակայն դա չի բացառվում, նշում են WSJ-ի զրուցակիցները։ Նշաններ չկան նաև, որ արտակարգ դեպքից հետո ջրի նմուշներ են վերցվել։
Միաժամանակ Չինաստանի Ժողովրդա-ազատագրական բանակի (PLA) ռազմածովային ուժերը փորձել են թաքցնել միջադեպը, հայտնում են WSJ-ի աղբյուրները։ ԱՄՆ-ում Չինաստանի դեսպանատունը Reuters-ին հայտնել է, որ դիվանագիտական առաքելությունը «ծանոթ չէ [նշված] իրավիճակին»։

«Ուսուցման ստանդարտների և սարքավորումների որակի վերաբերյալ ակնհայտ հարցերից բացի, միջադեպը ավելի խորը հարցեր է առաջացնում PLA-ի ներքին հաշվետվողականության և Չինաստանի պաշտպանական արդյունաբերության վերահսկողության վերաբերյալ, որը երկար ժամանակ է թաղված է կոռուպցիայի մեջ», – ասել է ԱՄՆ պաշտպանության նախարարության աղբյուրը WSJ-ին:

Խորտակված սուզանավը կառուցել է China State Shipbuilding Corp.-ը Վուաչանգ նավաշինարանում: Պենտագոնի զեկույցի համաձայն՝ 2022 թվականի դրությամբ Չինաստանն ուներ միջուկային էներգիայով աշխատող բալիստիկ հրթիռներ կրող վեց սուզանավ, վեց միջուկային շարժիչով հարվածային սուզանավ և 48 դիզելային շարժիչով հարձակողական սուզանավ։

Թարգմանությունը՝ Տաթև Ֆռանգյանի