Թուրքիայում ավստրալուհու են կալանավորել՝ PKK-ի հետ ենթադրյալ կապերի համար

Ստամբուլի դատարանը որոշում է կայացրել կալանավորել ավստրալուհուն, որը ձերբակալվել էր անցյալ շաբաթ՝ արգելված Քուրդիստանի աշխատավորական կուսակցության (PKK) հետ կապերի մեղադրանքով, գրում է Turkish Minute-ը։

51-ամյա Չիղդեմ Ասլանը ձերբակալվել է Ստամբուլի օդանավակայանում անցյալ շաբաթ՝ Մելբուրն մեկնելուց առաջ՝ Ստամբուլի ոստիկանության և Ազգային հետախուզական կազմակերպության (MİT) համատեղ գործողության արդյունքում։ Հաղորդվում է, որ նա երկար ժամանակ գտնվել է MİT-ի հսկողության տակ:

Նշվում է, թե բուժքույր Ասլանը ներգրավված է եղել Ավստրալիայում PKK-ի գործունեության մեջ և կապ է ունեցել այնտեղ PKK-ի գտնվող բարձրաստիճան պաշտոնյաների հետ: Նա նաև համանախագահել է քրդական կազմակերպությունում, որը կապված է PKK-ի հետ, մասնակցել Ավստրալիայում կազմակերպված բողոքի ցույցերին՝ ընդդեմ Իրաքում քրդական ուժերի դեմ թուրքական ռեյդերի։

Ըստ Մելբուռնում Կանանց առողջության բազմամշակութային կենտրոնի կայքի՝ Ասլանն Ավստրալիա է եկել 25 տարի առաջ՝ որպես Թուրքիայից քուրդ միգրանտ։ Նա բուժքույրի մասնագիտություն է ստացել Անկարայի համալսարանում, նաև ունի դիպլոմ համայնքային ծառայությունների ոլորտում, վկայական՝ ալկոհոլի և թմրամիջոցների կանխարգելման ոլորտում: Ասլանը, որն Ավստրալիայում բուժքույր է աշխատել տարբեր առողջապահական հաստատություններում, ներգրավված է մարդու և կանանց իրավունքների, համայնքային կամավորության և փոքրամասնությունների պաշտպանության հարցերում։

Ավստրալիայի արտաքին գործերի և առևտրի դեպարտամենտը երկրի Հեռարձակողների կորպորացիային հայտնել է, որ «հյուպատոսական օգնություն է ցուցաբերում Թուրքիայում կալանավորված ավստրալուհուն», սակայն այլ մանրամասներ չեն հաղորդվում։

Թուրքիայում քրդերը հաճախ են բախվում ահաբեկչության մեղադրանքների, թեև ներգրավված չեն եղել բռնության գործողության մեջ:

Միջազգային հանրությունը քննադատել է Թուրքիային հակաահաբեկչական օրենքների անորոշության և չարաշահման համար, որոնք լայնորեն օգտագործվում են կառավարության քննադատներին ճնշելու համար:

Թարգմանությունը՝ Էմմա Չոբանյանի