06.12.2025 | 19:41
ԿԳՄՍ նախարարությունը մեկնարկել է վորկաութի և առողջ ապրելակերպի խթանման ծրագիր
Խաղաղության պայմանագիր կլինի, եթե Հայաստանը փոխի իր Սահմանադրությունը․ Բայրամով
Քաղաքականություն
27.08.2024 | 22:20
Ադրբեջանը կարծում է, որ տարածաշրջանում կայուն խաղաղություն ապահովելու պատմական հնարավորություն կա։ Այս մասին հայտարարել է Ադրբեջանի արտգործնախարար Ջեյհուն Բայրամովը Անկարայում իր թուրք գործընկեր Հաքան Ֆիդանի հետ համատեղ մամուլի ասուլիսի ժամանակ: Նրա խոսքերով՝ հենց այդ պատճառով էլ ադրբեջանական կողմը Հայաստանին ներկայացրել է խաղաղության համաձայնագրի նախագիծը, 5 հիմնարար սկզբունքները:
«Չնայած բանակցային գործընթացում դրական դինամիկա է նկատվում, և համաձայնագրի նախագծի զգալի մասը համաձայնեցված է, Ադրբեջանի նկատմամբ տարածքային հավակնությունները շարունակում են պահպանվել Հայաստանի Սահմանադրության և մի շարք այլ նորմատիվ իրավական ակտերում։ Միևնույն ժամանակ, գաղտնիք չէ, որ Հայաստանը նաև տարածքային պահանջներ ունի Թուրքիայի Հանրապետության նկատմամբ։ Ներկայումս խաղաղության համաձայնագրի ավարտի հիմնական խոչընդոտը մեր երկրների նկատմամբ տարածքային պահանջներն են, որոնք շարադրված են Հայաստանի Սահմանադրությամբ»,- ասել է Բայրամովը:
Հիշեցնենք՝ բազմիցս ՀՀ ԱԳՆ-ն հայտարարել է, որ Հայաստանի Հանրապետությունը ճանաչում է իր բոլոր հարևանների տարածքային ամբողջականությունն ու սահմանների անխախտելիությունը: Հայաստանն ու Ադրբեջանը բարձրագույն մակարդակում պայմանավորվել են, որ ճանաչում են միմյանց տարածքային ամբողջականությունը և ինքնիշխանությունը՝ 1991 թվականի Ալմա-Աթայի հռչակագրի հիման վրա: Հայաստանի Հանրապետությունը հավատարիմ է այս սկզբունքին և միջազգայնորեն ճանաչված իր 29 հազար 743 քառակուսի կիլոմետր տարածքից դուրս հավակնություններ չունի:
