Հայաստանում չկան ո՛չ պետական, ո՛չ էլ մասնավոր «ուղեղային կենտրոններ». ապաքաղաքական զրույց Կարեն Հարությունյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է «ՍիվիլՆեթ» առցանց հեռուստատեսության գլխավոր խմբագիր Կարեն Հարությունյանը: Նրա կարծիքով՝ մանիպուլյացիայով, ապատեղեկատվություն տարածելով մարդիկ զբաղվել են դարեր շարունակ, սակայն այժմ դրա համար ստեղծվել են աննախադեպ լայն հնարավորություններ․ սոցցանցերի միջոցով թիրախավորվում են մարդկանց մեծ զանգվածներ:

Այժմ մանիպուլյատորները նստած են իրենց փոքրիկ ստուդիաներում և, օրինակ, զբաղվում են «աշխարհաքաղաքական» վերլուծություններով: Հաճախ, խմբագրի բնորոշմամբ, այդ «շառլատան բլոգերներն» ունեն ավելի մեծ լսարան, քան իրական վերլուծաբանները, որովհետև զանգվածային սպառողը գերադասում է պարզ՝ «սև-սպիտակ» լուծումներ, ինչպես նաև հակված է հավատալ դավադրությունների տեսությանը:

Խնդիրն ավելի է խորանում արհեստական բանականության պարագայում, երբ հնարավոր է ներբեռնել մի քանի աղճատված նախադասություն և ստանալ քիչ թե շատ ընկալելի տեքստ: Արհեստական բանականության վիճահարույց կողմերից է նաև այն, որ առայժմ այդ ծրագրերն օգտվում են ցանցում առկա բոլոր աղբյուրներից՝ խտրականություն չդնելով դրանց հեղինակավոր լինելու աստիճանի հարցում: Սակայն, ըստ հաղորդման հյուրի, շատ հավանական է, որ կոնկրետ այդ թերությունը տեսանելի ապագայում շտկվելու է:

Մանիպուլյացիայի, ապատեղեկավութան զոհ չդառնալու հիմնական գործիքներն են, ըստ Կարեն Հարությունյանի, մեդիագրագիտությունը, որակյալ մեդիաները, ինպես նաև հստակորեն գործող պետական և հասարակական ինստիտուտները: Լսարանի կողմնորոշվելու առումով որոշակի դեր կարող են խաղալ վերլուծական, «ուղեղային» կենտրոնները, որոնք, խմբագրի կարծիքով, Հայաստանում չկան ո՛չ պետական, ո՛չ էլ մասնավոր հատվածում:

Մանրամասները՝ տեսանյութում:

Արամ Աբրահամյան