Թուրքիայի երիտասարդների շուրջ 56%-ը ցանկանում է ապրել արտերկրում

Թուրքիայի երիտասարդների շուրջ 56 տոկոսը կցանկանար ապրել արտերկրում, եթե հնարավորություն ունենար։ Այս մասին է վկայում է«Երիտասարդությունը, արժեքները և ապագան երկրորդ դարի շեմին» հետազոտությունը, որն անցկացվել է Հիսարի դպրոցների հումանիտար և հասարակական գիտությունների հետազոտական ​​կենտրոնի կողմից՝ KONDA հետազոտական ​​ընկերության հետ համատեղ, գրում են թուրքական լրատվամիջոցները։

Հարցումն անցկացվել է 78 շրջաններում՝ 3147 հարցվածների մասնակցությամբ, որոնցից 930-ը՝ 15-29 տարեկան: 15-24 տարեկան երիտասարդների շրջանում կրթությունից դժգոհության մակարդակը կազմել է 71 տոկոս, որոնց մեծամասնությունը ուսանողներ են։ Եկամտի մակարդակի բարձրացման հետ մեկտեղ նվազել է կրթությունից բավարարվածության մակարդակը։

Հարցվածների 43 տոկոսի կարծիքով՝ կանայք տղամարդկանց հետ հավասար հնարավորություններ չունեն։ Նույն ցուցանիշը երիտասարդ կանանց մոտ հասնում է 50 տոկոսի։

15-24 տարեկան երիտասարդների գրեթե 60 տոկոսը ցանկացել է ապրել արտերկրում, «եթե նման հնարավորություն տրվի»։ 25-29 տարեկանների շրջանում նույն ցուցանիշը փոքր տարբերությամբ նվազել է, բայց այն դեռ կեսից ավելի է։

Թեև իրենց ապրելակերպը «ժամանակակից» բնութագրողների 62 տոկոսը կցանկանար ապրել արտասահմանում, «կրոնական պահպանողականների» շրջանում այս ցուցանիշը իջել է մինչև 28 տոկոս։

Մինչ ընդհանուր բնակչության 46 տոկոսը հավատս չունի ապագայի նկատմամբ, երիտասարդների շրջանում այս ցուցանիշը նվազել է մինչև 39 տոկոս:

Երիտասարդ կանայք ավելի հոռետես են իրենց ապագայի նկատմամբ, քան երիտասարդ տղամարդիկ:

Երիտասարդների երկու երրորդն ասել է, որ Թուրքիայում խոսքի ազատություն չկա։ Հարցին՝ ինչի՞ն պետք է ամենաշատ ուշադրություն դարձնել, պատասխանները ներառել են՝ ուժեղ տնտեսություն, արդարություն, համաշխարհային մակարդակի կրթություն, առողջապահություն, արժանիքներ, գենդերային հավասարություն և շրջակա միջավայրի պաշտպանություն։

Էմմա Չոբանյան