Իրանում տեղի է ունեցել ավիավթարից զոհված նախագահ Էբրահիմ Ռայիսիի հուղարկավորության արարողությունը

Կիրակի օրը ուղղաթիռի վթարի հետևանքով մահացած Իրանի նախագահ Էբրահիմ Ռայիսիին այսօր հուղարկավորել են երկրի հյուսիս-արևելքում գտնվող Մաշհադ քաղաքում։ Նախօրեին Իրանի երկրորդ քաղաք Մաշհադում ցուցադրվել են հանգուցյալ նախագահի հսկայական լուսանկարները, ինչպես նաև՝ սև դրոշներ ու իսլամական կրոնական խորհրդանիշներ, գրում է BBC-ի ռուսական ծառայությունը:

Ռայիսիից բացի, ևս յոթ մարդ էր զոհվել  Ադրբեջանի հետ սահմանի մոտ գտնվող լեռնային տեղանքում ուղղաթիռի կործանման հետևանքով, այդ թվում՝ Իրանի արտգործնախարար Հոսեյն Ամիր-Աբդոլլահիանը։ Երկրում զոհերի հիշատակին հնգօրյա սուգ է հայտարարվել։

Հինգշաբթի առավոտյան, Ռայիսիի դագաղը Մաշհադ տեղափոխելուց առաջ, նախագահի աճյունը պատվո ավտոշարասյունով տարվել է Բիրջանդի փողոցներով, որտեղ հազարավոր մարդիկ դուրս են եկել նախագահին հրաժեշտ տալու:

Հուղարկավորության արարողության հյուրերի թվում են եղել Թունիսի նախագահ Կաիս Սաիդը, Կատարի Էմիր Թամիմ բեն Համադ ալ-Թանին, ինչպես նաև վեց տասնյակ այլ երկրների պաշտոնական ներկայացուցիչներ, հաղորդում է IRNA-ն։
ԵՄ երկրները հարկ չեն համարել իրենց ներկայացուցիչներին պատվիրակել հուղարկավորությանը։ Եվրոպական երկրներից արարողությանը պաշտոնապես ներկա է եղել միայն Սերբիան, նաև՝ Ռուսաստանը (ի դեմս Պետդումայի նախագահ Վյաչեսլավ Վոլոդինի) և Բելառուսը։

Նախագահի մարմինը հանգրվանել է Իմամ Ռեզա դամբարանում՝ 13-րդ դարի ոսկեգմբեթավոր ճարտարապետական համալիրում, որը հարգում են շիա մահմեդականները՝ որպես Իմամ Ալի ալ-Ռեզայի հանգստավայր:
63-ամյա Ռաիսին Իրանում շատերի կողմից դիտվում էր որպես իր ուսուցչի՝ 85-ամյա Ալի Խամենեիի հնարավոր ժառանգորդը՝ որպես երկրի ապագա գերագույն առաջնորդ:

Չորեքշաբթի օրը Խամենեին առաջնորդեց թաղման թափորը՝ ծնկի գալով ութ մահացած մարդկանց աճյունների առաջ և զոհված նախագահին նահատակ անվանելով:

Հետևելով  այաթոլլայի ցանկություններին՝ Ռայիսին հետևողականորեն վարում էր կոշտ քաղաքականություն՝ ուղղված երկրում իսլամական հոգևորականության հզորության ամրապնդմանը, դիմելով նաև իր քաղաքական հակառակորդների դեմ ճնշումների:

Նախագահ Ռայիսին նաև կոշտ դիրքորոշում էր որդեգրել արտաքին քաղաքականության բազմաթիվ հարցերի վերաբերյալ, ինչպիսիք են Վաշինգտոնի հետ բանակցությունները 2015 թվականին Բարաք Օբամայի վարչակազմի հետ կնքված և նախագահ Դոնալդ Թրամփի օրոք դադարեցված միջուկային համաձայնագրի թարմացման շուրջ:
Իրանի նոր նախագահի ընտրությունները նշանակված են հունիսի 28-ին։ Մինչ այդ պետության ղեկավարի պարտականությունները ժամանակավորապես կկատարի երկրի առաջին փոխնախագահ Մոհամմադ Մոխբերը։