Քաղաքականություն
15.05.2024 | 15:08
Թուրքիայի ներքին գործերի Ալի Երլիքայան երկրում նոր հեղաշրջման փորձերի մասին տեղեկությունների ֆոնին X-ում գրել է, որ «ովքեր միավորված են ահաբեկչական կազմակերպությունների և դրանց ընդարձակման, կազմակերպված հանցավոր կազմակերպությունների հետ և փորձում են խաղ խաղալ նախագահի, կառավարության և քաղաքական գործիչների նկատմամբ FETO-ի մարտավարությամբ, կոչնչացվեն նրանց խաղերն ու լարած թակարդները»։
«Մեր նախագահի գլխավորությամբ չենք հանդուրժելու կազմակերպված հանցավոր կազմակերպություններին, քաղաքային գանգստերներին, թմրանյութ վաճառողներին, որոնք դարձել են միջազգային կարտելներ, միջազգային կազմակերպված ներգաղթյալների մաքսանենգներին, ապօրինի կազմակերպություններին և օտարերկրյա հետախուզական գործակալություններին առնչվող հանցավոր կենտրոններին, և մենք չենք հանդուրժի նրանց՝ ինչպես երեկ, այնպես էլ այսօր։ Եթե լինի որևէ կառույց, որը կթիրախավորի մեր նախագահին, կառավարությանը, քաղաքական գործիչներին, մենք գնալու ենք մինչև վերջ, բացահայտելու ենք այդ կառույցները և պատասխանատվության ենք ենթարկելու»,- գրել է Երլիքայան։
Նա նաև խոստացել է առաջիկայում հանրությանը զեկույց ներկայացնել։
«Պետական տեսուչների համապատասխան հաշվետվությունը կավարտվի կարճ ժամանակում։ Նրանք հերթով ստուգում են յուրաքանչյուր արված քայլ և հեռախոսային խոսակցություն։ Այս զեկույցով հանրության հետ կկիսվենք մանրամասնորեն։ Եվ մենք կանենք այն, ինչ անհրաժեշտ է»,- գրել է թուրք նախարարը։
Հիշեցնենք, որ թուրքական լրատվամիջոցները հայտնել էին, որ Թուրքիայի նախագահ Ռեջեփ Թայիփ Էրդողանը նախագահականում շտապ խորհրդակցություն է հրավիրել Ազգային հետախուզական ծառայության (MİT) ղեկավար Իբրահիմ Քալընի և արդարադատության նախարար Յըլմազ Թունչի մասնակցությամբ։ Կեսգիշերին տեղի ունեցած խորհրդակցության օրակարգն Անկարայի ոստիկանությունից հեռացված ոստիկանապետերի նկատմամբ հետաքննությունն է եղել՝ հնարավոր հեղաշրջման փորձի հետ կապված։
Էմմա Չոբանյան
