Էրդողանը շտապ խորհրդակցություն է հրավիրել՝ Թուրքիայում նոր հեղաշրջման մասին լուրերի պատճառով

Թուրքիայի նախագահ, իշխող «Արդարություն և զարգացում» կուսակցության ղեկավար Ռեջեփ Թայիփ Էրդողանը նախագահականում շտապ խորհրդակցություն է հրավիրել Ազգային հետախուզական ծառայության (MİT) ղեկավար Իբրահիմ Քալընի և արդարադատության նախարար Յըլմազ Թունչի մասնակցությամբ։ Թուրքական լրատվամիջոցները հայտնում են, որ կեսգիշերին տեղի ունեցած խորհրդակցության օրակարգն Անկարայի ոստիկանությունից հեռացված ոստիկանապետերի նկատմամբ հետաքննությունն է եղել՝ հնարավոր հեղաշրջման փորձի հետ կապված։

Sabah-ի լրատվական բաժնի համակարգող Աբդուրահման Շիմշեքը հանդիպման մանրամասների մասին տեղեկատվություն է տարածել։

«Էրդողանը նախագահական համալիր է հրավիրել MİT-ի նախագահ Իբրահիմ Քալընին և արդարադատության նախարար Յըլմազ Թունչին։ Հանդիպման օրակարգում է եղել Անկարայի ոստիկանական բաժանմունքում Այհան Բորա Կապլանի նկատմամբ հետաքննությունը։ Նշվում է նաև, որ այս հանդիպումից հետո շատ կրիտիկական որոշումներ են լինելու»,- ասել է նա։

Նշենք, որ Անկարայի կողմից հանցավոր ճանաչված «Այհան Բորա Կապլան» կազմակերպության դեմ հետաքննության շրջանակում օրերս ՆԳՆ-ի կողմից ծառայողական պարտականությունները դադարեցրած 3 ոստիկանապետերի տներում խուզարկություններ են կատարվել։

Այս ամենից հետո Էրդողանի դաշնակից «Ազգայնական շարժում» կուսակցության (MHP) նախագահ Դևլեթ Բահչելին հայտարարել էր, որ այս իրավիճակը դավադրություն է, որը չի կարող անտեսվել մի քանի ոստիկանապետերի պաշտոնանկությամբ։

«Եթե մենք ենթարկվենք նրանց, որոնք ծրագրում են կրկնել հեղաշրջման փորձը՝ 17-25 հոգու հասնող համախոհներով ոստիկանությունում և դատական համակարգում ​​գործընկերների մասնակցությամբ, ամո՛թ մեզ»,- հայտարարել է Բահչելին։