Ավարտական քննություններով դեպի բուհ․ փոփոխության ռիսկերն ու հնարավորությունները․ ՏԵՍԱՆՅՈՒԹ

2026 թվականից ավարտական քննությունների արդյունքները հիմք կհանդիսանան բուհի ընդունելության համար: Այս մասին վերջերս հայտարարեց ԿԳՄՍ նախարար Ժաննա Անդրեասյանը, որը ներկայացնելով նախագիծը՝ հիշեցրեց, որ Տավուշի մարզում 2021-2022 ուստարվանից փորձարկվում է հանրակրթության նոր չափորոշիչը, և այս տարի արդեն կան նոր չափորոշիչով իրենց ուսումնառությունն ավարտող առաջին շրջանավարտները. հենց նրանք կլինեն առաջին դիմորդները, որոնց համար դպրոցի ավարտական քննությունները հիմք կլինեն բուհ ընդունվելու համար: 2026-ից այս համակարգը կգործի արդեն բոլոր շրջանավարտների համար։

Կրթության փորձագետ Սերոբ Խաչատրյանը, սակայն, այն համոզման է, որ այդպիսով կրկնուսույցներից կախվածությունն ավելի կմեծանա։

«Երբ դու ունես շտեմարանային համակարգ, դիմորդը կարող է նստել, այդ ամենը սովորել։ Հիմա, ներդրվում է համակարգ, որտեղ առկա են բանալիներ, և մեկը պետք է լինի, որպեսզի քեզ հուշի, ուղղություն տա: Մտահոգություն ունեմ, որ այդ ամենը կարող է մեծացնել կախվածությունը կրկնուսույցներից»,- ասում է նա:

Երևանի թիվ 198 դպրոցի սան Մանե Մինասյանը սովորում է 10-րդ դասարանում, որոշել է միջազգայնագետ դառնալ։ Ասում է՝ ընդունելության նոր համակարգը կարող է թույլ ունակություններով դիմորդներին մղել հաջողության: Մինչդեռ, նույն դպրոցի սան Մարի Պետրոսյանը նախագծի հետ կապված նոր հնարավորություններ է տեսնում, ասում է՝ այն կդրդի սովորողներին, օրինակ, ավելի քիչ բացակայել դասերից:

Ուսուցչուհի Նարինե Գալստյանն է նկատում է՝ նոր համակարգը կձերբազատի դիմորդներին ավելորդ սթրեսից և լարվածությունից: Բացի երեք պարտադիր առարկաներից՝ «Հայոց լեզու», «Հայոց պատմություն» և «Մաթեմատիկա», շրջանավարտները հնարավորություն կունենան քննություն հանձնել բոլոր առարկաներից՝ կամընտրական բաղադրիչով: Քննությունների կազմակերպումը կիրականացվի ԳԹԿ-ի կողմից, ուսումնական հաստատություններում:

Հետագայում ընդունելության քննությունները կիրականացվեն համակարգչային եղանակով, կնվազեցվի նաև քննությունների թիվը:

Մանրամասները՝ տեսանյութում:

Աննա Բաբաջանյան