Կոչ ենք անում Երևանի ղեկավարությանը թույլ չտալ, որ Արևմուտքը խաբի իրեն. ՌԴ ԱԳՆ-ն` բրյուսելյան հանդիպման մասին

ՌԴ ԱԳՆ-ն հայտարարություն է տարածել՝ իր դժգոհությունները հայտնելով Բրյուսելում կայացած ՀՀ-ԱՄՆ-ԵՄ հանդիպման վերաբերյալ։  Նշվում է, որ Մոսկվան հանդիպումը դիտարկում է որպես «Հարավային Կովկասը աշխարհաքաղաքական առճակատման մեջ ներքաշելու «Հավաքական Արևմուտքի» հերթական փորձը»։ «Հարավային Կովկասի գործերին արտատարածաշրջանային ուժերի անպատասխանատու և կործանարար միջամտությունը, տարածաշրջանի երկրների և նրանց հարևանների միջև սեպ խրելու ցանկությունը կարող է հանգեցնել առավել բացասական հետևանքների տարածաշրջանի կայունության, անվտանգության և տնտեսական զարգացման համար, հրահրել նոր բաժանարար գծերի առաջացման, ինչպես նաև լարվածության անվերահսկելի աճի»,-ասվում է հայտարարության մեջ։

Ըստ Մոսկվայի՝ «Արևմուտքը ցանկանում է Հայաստանը վերածել Հարավային Կովկասում իր չափազանց վտանգավոր ծրագրերի իրականացման գործիքի»։

«Մենք գիտենք, որ Վաշինգտոնը և Բրյուսելը, վաղանցիկ խոստումների ներքո, ձգտում են հասնել Հայաստանի դուրս գալուն ՀԱՊԿ-ից և ԵՏՄ-ից, ռուսական ռազմակայանի և սահմանապահների դուրսբերմանը։ Կոչ ենք անում Երևանի ղեկավարությանը թույլ չտալ, որ Արևմուտքը խաբի իրեն և երկիրը տանի սխալ ճանապարհով, որը հղի է անվտանգության վակուումի առաջացմամբ, տնտեսության մեջ լուրջ խնդիրներով և բնակչության արտահոսքով։ Բրյուսելում հայտարարված դրամաշնորհային աջակցության ծավալները չեն կարող համեմատվել այն բազմամիլիարդանոց օգուտների հետ, որոնք Հայաստանը շարունակում է ստանալ Մոսկվայի հետ ԵԱՏՄ և ԱՊՀ շրջանակներում փոխգործակցությունից։ Հենց այս գործոններն են վերջին տարիներին ապահովել ապրանքաշրջանառության բազմակի աճ և արդյունքում՝ ռեկորդային տնտեսական աճ և բնակչության բարեկեցության աճ»,-ասվում է հայտարարության մեջ։

ՌԴ ԱԳՆ-ն նշում է, թե հաստատում են իրենց  հանձնառությունը համակողմանիորեն խորացնելու և ընդլայնելու Հայաստանի հետ հարաբերությունները հիմնարար երկկողմ փաստաթղթերում և համաձայնագրերում ամրագրված սկզբունքների հիման վրա՝ ընդհանուր ինտեգրացիոն ասոցիացիաների միջոցով։

«Համոզված ենք, որ ռուս-հայկական դաշինքի առաջանցիկ զարգացումը կնպաստի Ռուսաստանի և Հայաստանի ժողովուրդների հիմնարար շահերի իրականացմանը, տարածաշրջանային անվտանգության և կայունության ամրապնդմանը։  Արևմուտքը չի հրաժարվում նաև հայ-ադրբեջանական հարաբերությունների կարգավորման հիմնարար հիմքը ոչնչացնելու փորձերից՝ Ռուսաստանի, Հայաստանի և Ադրբեջանի ղեկավարների 2020-2022 թվականների եռակողմ հայտարարությունների շարքը, որոնք նախատեսում են միջոցներ տրանսպորտային և տնտեսական կապերի ապաշրջափակման, սահմանների սահմանազատման համար, խաղաղության պայմանագիր պատրաստման, վստահության ամրապնդման հասարակական գործիչների և փորձագետների շփումների միջոցով։ Հենց Վաշինգտոնի և Բրյուսելի ճնշման տակ էր, որ պաշտոնական Երևանը կասեցրեց այդ պայմանավորվածությունների կատարումը, որոնցից շատերի, մասնավորապես, փոխադարձ տրանսպորտային շրջափակման վերացման հարցում կողմերը մոտ էին փոխընդունելի լուծումներին։ Մոսկվան պատրաստ է ամեն կերպ աջակցել Ադրբեջանի և Հայաստանի միջև երկար սպասված խաղաղությանը,»,-նշվում է հայտարարության մեջ։

Ըստ ՌԴ ԱԳՆ-ի՝ Հարավային Կովկասում և՛ տարածաշրջանային, և՛ երկկողմ բնույթի խնդրահարույց հարցերը պետք է լուծվեն «տարածաշրջանային պատասխանատվության» սկզբունքին համապատասխան, որը համաձայնեցվել է 2023 թվականի հոկտեմբերի 23-ին Թեհրանում «3+3» խորհրդատվական հարթակի երկրորդ հանդիպման ժամանակ, որի մասնակիցն էր նաև Հայաստանը։

Մոսկվան կոչ է անում «արտաքին խաղացողներին հարգել այդ պայմանավորվածությունները, իսկ Հայաստանի իշխանություններին իրենց արտաքին քաղաքական գիծը կառուցելիս հաշվի առնել հարևան պետությունների մտահոգությունները»։