07.04.2026 | 21:55
Արարատ Միրզոյանը նվեր է ստացել Օմանի ԱԳ նախարարից
Մեծ Բրիտանիան ցանկանում է օգնել Ադրբեջանին կիբերանվտանգության ոլորտում
Քաղաքականություն
04.03.2024 | 18:24
Մեծ Բրիտանիան պատրաստ է կիբերանվտանգության ոլորտում իր փորձը կիսել Ադրբեջանի հետ։ Ադրբեջանական APA գործակալության հաղորդմամբ՝ այս մասին հայտարարել է Բաքվում Մեծ Բրիտանիայի դեսպան Ֆերգյուս Օլդը՝ ելույթ ունենալով Ադրբեջանում Կիբերանվտանգության կազմակերպությունների ասոցիացիայի հետ համատեղ կազմակերպված կիբերանվտանգության թեմայով ցուցահանդեսում։
Դեսպանն ասել է, որ Ադրբեջանը «բավականին բարդ հարևանություն ունի», և այս առումով կիբերանվտանգությունը շատ կարևոր է ռազմական ոլորտում, ինչպես նաև այլ ոլորտներում:
«Մեծ Բրիտանիայի կողմից Ադրբեջանում առաջին անգամ կազմակերպված կիբերանվտանգության ցուցահանդեսում, ներկայացված են մեր 4 առաջատար ընկերությունները։ Նման ցուցահանդեսի կազմակերպման նպատակն է աջակցել Ադրբեջանին տարբեր ոլորտներում կիբերանվտանգության դեմ պայքարում»,- ասել է Օլդը՝ հավելելով, որ «Ադրբեջանը պետք է օգտագործի ամենառաջադեմ մեթոդները հնարավոր կիբերհարձակումները կանխելու համար»։
Ըստ նրա՝ Ադրբեջանն այժմ անհրաժեշտ քայլեր է ձեռնարկում կիբերանվտանգության դեմ պայքարում։
2022 թվականի հուլիսին բացվել է Ադրբեջանի ՊՆ կապի, տեղեկատվական տեխնոլոգիաների և կիբերանվտանգության գլխավոր վարչության կիբերանվտանգության օպերատիվ կենտրոնը։ Այն իրականացնում է տեղեկատվական, հեռահաղորդակցության տեխնոլոգիաների և հրամանատարության ու կառավարման համակարգերի կանոնավոր մոնիթորինգ, կառավարում, սպառնալիքների ժամանակին հայտնաբերում, թվային հետաքննություն, էլեկտրոնային անվտանգության ստուգումներ և այլ աշխատանքներ:
Այս ոլորտում Բաքվին ակտիվ աջակցում է նաև Իսրայելը։ 2022-ին համաձայնագիր է ստորագրվել Ադրբեջանի Թվային զարգացման և տրանսպորտի նախարարությանն առընթեր Էլեկտրոնային անվտանգության ծառայության և իսրայելական հանրահայտ Technion համալսարանի միջև, որն էլ պատրաստելու է ավելի քան 1000 մասնագետի կենտրոնի համար։
Էմմա Չոբանյան
