17.05.2024 | 17:51
Սլովակիայի վարչապետն այլևս վիրահատության չի ենթարկվի
«34 տարի պիտանի էինք, մի վայրկյանում դարձանք անպետք».ԿԳՄՍՆ-ի առաջարկը` հեռացված 1300 ուսուցիչներին. ՏԵՍԱՆՅՈՒԹ
Հասարակություն
26.01.2024 | 20:32
Ավելի քան 30 տարվա մանկավարժական փորձ ունեցող Լիլյա Դադյանն այլևս դպրոցում չի աշխատում. նա մեկն է միջին մասնագիտական կրթություն ունեցող շուրջ 1300 ուսուցիչներից, որոնք աշխատանքը շարունակելու հնարավորություն չեն ստացել: Պատճառը «Հանրակրթության մասին» օրենքի պահանջն է և կամավոր ատեստավորման արդյունքները:
ԿԳՄՍՆ-ն հայտարարում է՝ պետությունը պատրաստ է աջակցել միջին մասնագիտական կրթությամբ ուսուցիչներին բարձրագույն կրթություն ստանալու հարցում։ Եթե նրանք նման ցանկություն ունենան, կառավարությունն առաջարկում է ուսման վարձի փոխհատուցում։
«Եթե դուք ուսման հնարավորություն եք տալիս, ուրեմն մեզ չպետք է ազատեք աշխատանքից: Կամ գոնե ուսուցիչները պետք է երաշխիք ունենան, որ սովորելուց հետո կկարողանան աշխատանքի անցնել։ Չէ՞ որ իրենց թափուր տեղն արագ լրացվում է»,- ասում է Փարաքարի միջնակարգ դպրոցի ուսուցչուհի Վարդուհի Ասատրյանը:
Աշխատանքից ազատված ուսուցիչները մի քանի անգամ բողոքի ակցիա են իրականացրել ԿԳՄՍ նախարարության շենքի մոտ։ Հունվարի 9-ին ակցիայի մասնակիցներին ընդունել էր նախարար Ժաննա Անդրեասյանը և տեղեկացրել ուսման վարձի փոխհատուցման ծրագրի մասին։
Նախարարության մոտեցումները, սակայն, չեն բավարարում ակցիայի մասնակիցներին․ նրանք հունվարի 23-ին ևս եկել էին նախարարություն` պահանջելով հանդիպում Ժաննա Անդրեասյանի հետ, սակայն հանդիպումն այդպես էլ չէր կայացել: Նախարարությունից խոստացել են, որ երեքշաբթի կկազակերպեն Անդրեասյանի հետ հանդիպումը:
Մինչ այդ, մանկավարժներն ահազանգում են, որ իրենց կարգավիճակում հայտնված ուսուցիչներից գրեթե բոլորին արդեն հեռացրել են՝ առանց լսելու իրենց առաջարկները:
«Ես դեռ 53 տարեկան եմ, կհասցնեմ սովորել, բա այն ուսուցիչները, որոնք վաթսունն անց են, ի՞նչ են անելու: Չէ՞ին կարող մի քանի տարի պահել, հետո պատվով ուղարկել թոշակի»,- նշում է Աղավնաձորի միջնակարգ դպրոցի ուսուցչուհի Լիլյա Դադյանը:
ԿԳՄՍՆ-ն առաջարկում է դիտարկել ուսումնական հաստատություններում այնպիսի հաստիքներ զբաղեցնելու հնարավորությունը, որոնց դեպքում բարձրագույն կրթության պահանջ սահմանված չէ: Խոսքը, մասնավորապես, գրադարանավարի, լաբորանտի, օպերատորի, նախակրթարանի դաստիարակի հաստիքների մասին է: Ազատված ուսուցիչները դա իրատեսական չեն համարում, ասում են՝ այդ հաստիքները վաղուց զբաղված են։
Մանրամասները՝ տեսանյութում:
Աննա Բաբաջանյան
