2 ամիս՝ առանց դասի գնալու․ 4000 արցախցի աշակերտ դեռ չի տեղավորվել հայաստանյան դպրոցներում․ ՏԵՍԱՆՅՈՒԹ

Արման Ալավերդյանն Արցախի Մարտունի քաղաքից է․ նա մեկն է 21 հազար բռնի տեղահանված դպրոցականներից: Արմանը դպրոցական առաջին քայլերն արել է հարազատ քաղաքում: Դեռ չէին հասցրել տառերը սովորել, երբ սկսվեց պատերազմը: Մինչ այդ էլ շրջափակման պատճառով դասերն ընդամենը 30 րոպե էին տևում: Բռնի տեղահանությունից հետո բնակություն են հաստատել Երևանում։

Արմանի մայրը՝ Ռիմա Ավագյանը, «Քանաքեռ-Զեյթուն» վարչական շրջանում չի կարողանում հարմար դպրոց գտնել, օրինակ՝ թիվ 59 դպրոցում ասել են, որ առաջին դասարանցու ընդունել չեն կարող:

ԿԳՄՍ նախարարության Հանրակրթության վարչության պետ Թամարա Սարգսյանը շեշտում է՝ այն դպրոցները, որոնք չունեն լիցենզիայով սահմանված տեղեր, ընդունելություն իրականացնել չեն կարող: Ցույց է տալիս նախարարության գործարկած license.emis.am կայքը, որի միջոցով հնարավոր է ընտրել վարչական շրջանը, տվյալ դպրոցը և տեղեկանալ՝ այնտեղ ազատ տեղ կա՞, թե՞ ոչ:

Թամարա Սարգսյանի խոսքով՝ Երևանի բոլոր վարչական շրջաններում կան դպրոցներ, որոնք դեռ կարող են ընդունել Արցախից տեղահանված աշակերտների: Ասում է՝ գուցե դա ամենամոտ դպրոցը չլինի, բայց դպրոց կգտնվի: Իսկ եթե ծնողները դժվարանում են օգտվել կայքից, կարող են դիմել տվյալ դպրոց, եթե վերջինս տեղ չունի, պետք է ուղղորդի համապատասխան դպրոց, որտեղ կան ազատ տեղեր:

Արցախից բռնի տեղահանված 21 հազար դպրոցականներից շուրջ 17 հազարն է գրանցված կրթության կառավարման տեղեկատվական համակարգում և հաճախում է դպրոց: Մոտ 4000 աշակերտ դեռևս ընդգրկված չէ կրթական պրոցեսում:

Հանրակրթության վարչության պետի խոսքով՝ պատճառները տարբեր են․ սովորողներից ոմանք երկրից դուրս են եկել, ոմանք նախնական շրջանում բնակվել են, օրինակ, հանգստյան գոտիներում, որոնք հեռու են եղել դպրոցներից:

Կրթության փորձագետ Սերոբ Խաչատրյանը, խոսելով արցախցի դպրոցականների՝ կրթական գործընթացում ներգրավված չլինելու խնդրի մասին, շեշտում է՝ զգալի թվով սովորողներ պարզապես արտագաղթել են։ Նրա կարծիքով՝ իրավիճակն ավելի մտահոգիչ է մեծ քաղաքներում:

Մանրամասները՝ տեսանյութում։

Աննա Բաբաջանյան