«Մերձավանի Արցախը»․ ինչ խնդիրների են բախվում տեղահանված ուսուցիչներն ու աշակերտները․ ՏԵՍԱՆՅՈՒԹ

6-ամյա Միլենան մեկն է այն 28 արցախցի աշակերտներից, որ հաճախում են Մերձավանի միջնակարգ դպրոց: Աղջկա ընտանիքը Մարտունու շրջանի Հերհեր գյուղից է բռնի տեղահանվել: Ասում է`ուրախ է, որ դպրոցում արցախցի երեխաները շատ են, բայց մյուս ընկերների շրջանում էլ իրեն լավ է զգում:

Դպրոցը հասցրել է ընդունել նաև արցախցի երեք ուսուցչի: Արգինե Տոնյանը, որը դպրոցում ուսուցչի օգնական է աշխատում, երկու անգամ է տեղահանվել․ առաջին անգամ՝ Հադրութից, երկրորդ անգամ՝ Ստեփանակերտից։

«Ճիշտ է՝ Արցախից հետո դժվար է այստեղ, բայց հարմարվել ենք: Փորձում ենք հաղթահարել դժվարությունները, որ կան։ Օրինակ՝ աշխատավարձն է ցածր այնտեղի համեմատ»,- ասում է նա:

Արցախցի ուսուցիչ Նուբար Խաչիյանն էլ, խոսելով դժվարությունների մասին, նշում է, որ եթե Արցախում ավանդական մատյաններ էին օգտագործում, ապա այստեղ՝ էլեկտրոնային, ինչին իրենք նոր են սովորում:

Դպրոցի տնօրեն Զարուհի Ստեփանյանը պատմում է, որ իրենք հասցրել են ընդունել աշակերտների Շուշիից, Հադրութից, Ասկերանից, Ճարտարից և Արցախի այլ հատվածներից։

«Արցախցիների գալուն ընդառաջ դասարաններ ենք կահավորել, սեղաններ ավելացրել, մեր աշակերտները դասագրքեր են տվել նրանց, ովքեր չունեին»,- ասում է տնօրենը:

Ըստ Զարուհի Ստեփանյանի՝ որոշել են սովորել Արցախի բարբառը, որպեսզի հաղորդակցվելն ավելի դյուրին դառնա:

Լեռնային Ղարաբաղից ընդհանուր տեղահանվել է 21 հազարից ավելի դպրոցական։ Այս պահին շուրջ 17 հազար արցախցի երեխա է տեղավորվել Հայաստանի տարբեր դպրոցներում։ Ստացվում է՝ տեղահանությունից շուրջ երկու ամիս անց մոտ 4 հազար աշակերտ դեռևս ներգրավված չէ ուսումնական պրոցեսում։

Մանրամասները՝ տեսանյութում:

Աննա Բաբաջանյան