16.01.2025 | 23:17
Առաջիկայում տեղի կունենա Վրաստանի, Ադրբեջանի և Թուրքիայի ԱԳ նախարարների հանդիպում
Բաքվում անհանգստացած են Արցախի վերաբերյալ ԵԽԽՎ-ի ընդունած բանաձևից ու էթնիկ զտումների մեղադրանքներից
Քաղաքականություն
16.10.2023 | 22:02
ԵԽԽՎ-ն հոկտեմբերի 12-ին ընդունել է «Հումանիտար իրավիճակը Լեռնային Ղարաբաղում» վերտառությամբ բանաձևը։ Այն դատապարտում է 2023 թվականի սեպտեմբերի 19-ին Լեռնային Ղարաբաղի դեմ Ադրբեջանի ռազմական գործողությունները և արձանագրում, որ Լեռնային Ղարաբաղի գրեթե ամբողջ բնակչությունը լքել է իր հայրենիքը ֆիզիկական ոչնչացման վտանգի և Ադրբեջանի կառավարության երկարամյա հայատյաց քաղաքականության պատճառով։ Վեհաժողովը նաև արձանագրում է, որ առկա են էթնիկ զտումների իրականացման հիմնավոր կասկածներ։
Այս բանաձևն Ադրբեջանում բուռն քննարկումներ ու քննադատություններ է առաջացրել։ Մասնավորապես, պաշտոնական Բաքուն դժգոհում է բանաձևից՝ նշելով, թե ԵԽԽՎ-ն պետք է դադարեցնի Ադրբեջանի դեմ ուղղված անհիմն և կանխակալ քայլերը։
«Մենք կտրականապես մերժում և դատապարտում ենք 2023 թվականի հոկտեմբերի 12-ի Եվրոպայի խորհրդի Խորհրդարանական վեհաժողովի (ԵԽԽՎ) թիվ 2517 բանաձևը և 2260 խորհրդատվությունը։ԵԽԽՎ-ն շարունակում է մոտեցում ցուցաբերել՝ հիմնված անհիմն խոսակցությունների և մեր տարածաշրջանի որոշ երկրների ստոր քաղաքականության վրա՝ ուղղված Ադրբեջանին նսեմացնելուն»,- ասվում է Ադրբեջանի ԱԳՆ հայտարարության մեջ։
Ադրբեջանական փորձագիտական դաշտին դուր չի գալիս նաև, որ ԵԽԽՎ բանաձևում օգտագործվում է Լեռնային Ղարաբաղ անվանումը։ Միաժամանակ, Բաքվում փորձում են ցույց տալ, թե բանաձևի ընդունումն իրենց համար նշանակություն չունի։
«ԵԽԽՎ, Եվրախորհրդարան և այլ միջազգային կառույցներ, եթե բանաձևերում չկան ապացուցված փաստեր, ապա այդ փաստաթղթերն օդ են Բաքվի համար, Ադրբեջանը չի լսի միակողմանի բանաձևերը»,- ասել է ադրբեջանցի քաղաքագետ Ֆարհադ Մամեդովը։
Միլլի Մեջլիսի պատգամավոր Ռասիմ Մուսաբեկովն էլ կոչ է արել Ադրբեջանին «չգերդրամատիզացնել ստեղծված բարդ իրավիճակը»։ Նա ընդգծել է ադրբեջանցի դիվանագետների, քաղաքական գործիչների, լրագրողների և հասարակական գործիչների կենտրոնացված և ժամանակին արձագանքի կարևորությունը։
Բացի այդ, Բաքվին շարունակում է մտահոգել նաև միջազգային տարբեր կառույցների կողմից Արցախում Ադրբեջանի կողմից իրականացված էթնիկ զտումների արձանագրման և այդ մասին բարձրաձայնելու փաստը։
Մասնավորապես, իրավապաշտպան Ֆուադ Հասանովը նշել է, թե «էթնիկ զտումներ» տերմինը լայնորեն է կիրառվում է, հեղինակավոր ԶԼՄ-ներում ժամանակ առ ժամանակ հրապարակում են նյութեր, որոնք կասկածի տակ են դնում ադրբեջանցիների «պայքարի արդարությունն ու օրինականությունը հանուն իր երկրի տարածքային ամբողջականության և ինքնիշխանության»։ Իրավապաշտպանի կարծիքով՝ էթնիկ զտումների մասին մեղադրանքները հերքելու «բանալին թե՛ տարածաշրջանային, թե՛ միջազգային ճակատներում հասարակական կարծիքի ձևավորման մեխանիզմ ստեղծելու մեջ է, որը պահանջում է ճկուն, ակտիվ տեղեկատվական կառույցների ներգրավում»։
Էմմա Չոբանյան
