20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
ԼՂ-ից տեղահանվածների համար գանձապետական նվիրաբերության հաշիվ կբացվի․ փոխվարչապետ․ ՏԵՍԱՆՅՈՒԹ
28.09.2023 | 11:42
Այս գիշեր՝ ժամը 12-ից մինչև առավոտյան ժամը 10-ը, տեղահանվածների թիվը կազմել է 8 100։ Այս մասին Կառավարության սեպտեմբերի 28-ի նիստին ասաց հումանիտար կենտրոնի աշխատանքները համակարգող, ՀՀ փոխվարչապետ Տիգրան Խաչատրյանը: Բռնի տեղահանվածների ընդհանուր թիվը հասել է 66 500-ի։
Տիգրան Խաչատրյանն ընդգծեց, որ պետությունը փորձում է այն անձանց նույնականացնել, որոնք այդ պահին որևէ կարիքի անհրաժեշտությամբ դիմում են պատկան մարմիններին:
«Ունենք նաև օպերատիվ տվյալներ, թե այս օրերի ընթացքում տարբեր մարզերում մեր աջակցությամբ օթևան գտած անձանց թիվը որքան է: Այս պահի դրությամբ 11 հազարին մոտ է: Բաշխվածությունը մարզերի միջև գրեթե նույնն է»,- ասաց փոխվարչապետը, ապա հավելեց, որ չնայած մարզերում տեղահանվածների բաշխվածությունը գրեթե նույնն է, այնուամենայնիվ, երկու մարզում՝ Կոտայքում և Սյունիքում, նրանք որոշակի թվով ավելի են:
«Ուզում եմ խնդրել նաև՝ մեր տեղահանված քույրերը և եղբայրները որոշակի ըմբռնումով վերաբերվեն այն իրավիճակին, որ գուցե ոչ բոլորին են միաժամանակ առաջարկվում այն պայմանները, որ իրենց համար նախընտրելի կհամարվեն»,- ասաց Տիգրան Խաչատրյանը:
Փոխվարչապետը հավաստիացրեց, որ ԼՂ-ից տեղահանվածների համար գանձապետական նվիրաբերության հաշիվ կբացվի․ «Մենք այսօր ֆինանսների նախարարի հետ պայմանավորվել ենք, որ օրվա ընթացքում գանձապետական նվիրաբերության հաշիվ բացված կլինի, և դրա վերաբերկալ տեղեկատվությունը կհրապարակվի նախարարության կայքում: Հետևաբար բոլոր այն կազմակերպություններին, որոնք ցանկանում են իրենց ֆինանսական աջակցությունը ցուցաբերել, այդ տեղեկատվությունը հասանելի կլինի: Մենք պարբերաբար հաշվետվություններ կտարածենք, թե այդ միջոցները ինչպես են օգտագործվել»:
Մանրամասները՝ տեսանյութում։
