Թուրք մտավորականները դիմել են համաշխարհային հանրությանը՝ օդային փոխադրումների միջոցով ճեղքել ԼՂ շրջափակումը

Թուրքիայից մի շարք քաղաքական գործիչներ, գրողներ և մարդու իրավունքների պաշտպաններ համախմբվել են՝ խնդրելով դիմել համաշխարհային հանրությանը և կոչ անել անհապաղ միջամտել՝ Լեռնային Ղարաբաղում Ադրբեջանի շրջափակման հետևանքով առաջացած հումանիտար ճգնաժամը մեղմելու համար, հաղորդում է Gercek News-ը։

Հրապարակման համաձայն՝ քանի որ Ադրբեջանի կողմից Լաչինի միջանցքի շրջափակումը թևակոխում է ութերորդ ամիսը, և երբեմնի կենսունակ Լեռնային Ղարաբաղը գտնվում է սարսափելի հումանիտար ճգնաժամի եզրին, մի խումբ թուրք մտավորականներ, գրողներ, քաղաքական գործիչներ և մարդու իրավունքների պաշտպաններ միավորվել են՝ ազդեցիկ կոչով դիմելով համաշխարհային հանրությանը ու կոչ անելով անհապաղ միջամտել՝ Լեռնային Ղարաբաղում տառապանքը մեղմելու և հնարավոր աղետը կանխելու համար:

«Անողոք շրջափակումը, որը հաստատվել է Բաքվի կառավարության կողմից և ուժեղացվել Անկարայի աջակցությամբ, ոչ միայն մեկուսացրել է Լեռնային Ղարաբաղի հայ բնակչությանը, այլև մտավախություն է առաջացրել մոտալուտ ցեղասպանության վերաբերյալ: Այս ծանր իրավիճակը դրդել է մի խումբ ազդեցիկ թուրք գործիչների բարձրաձայնել իրենց ձայնը՝ ջատագովելով միջազգային գործողությունների՝ դադարեցնելու շրջափակումը և փրկօղակ առաջարկելու շրջափակման մեջ գտնվող բնակիչներին»,- նշվում է հրապարակման մեջ:

Դիմումի հիմքում ընկած է այն համոզմունքը, որ անընդունելի է սպասել հումանիտար աղետի առաջացմանը և հետո միայն գործել:

«Ակնհայտ է, որ առաջին անհրաժեշտության ապրանքներ հնարավոր չէ առաքել Ղարաբաղ, և բնակիչները հայտնվել են թակարդում՝ առանց բժշկական շտապ օգնության հասանելիության: Ճգնաժամի խորացմանը և միջազգային մտահոգությունների վերահաստատմանը զուգընթաց՝ Բաքվի բռնապետ Իլհամ Ալիևը շարունակում է բացահայտ և շարունակաբար սպառնալ Ղարաբաղի ժողովրդին: Բանը հասել է նրան, որ Միջազգային քրեական դատարանի նախկին գլխավոր դատախազ Լուիս Մորենո Օկամպոն հրապարակել է զեկույց, որում Ալիևի գործողությունները Ղարաբաղում բնութագրում է որպես ցեղասպանություն»,- ասվում է խմբի հայտարարության մեջ, որը կոչ է անում բոլոր պետություններին, միջազգային կազմակերպություններին, մասնավորապես, ՄԱԿ-ին և ԿԽՄԿ-ին, ինչպես նաև միջազգային հանրությունը ակտիվ դիրքորոշում ցուցաբերել այս հարցում:

«Ինչպես 1948-49 թվականներին օդային փոխադրումների միջոցով ճեղքվեց Բեռլինի շրջափակումը, մենք կոչ ենք անում ճեղքել Ղարաբաղի շրջափակումը օդային մատակարարման ուղիներով՝ դրանով իսկ վերջ դնելով մարդասիրական այս ողբերգությանը»,- ասված է հայտարարության մեջ՝ պատմական զուգահեռ տանելով Երկրորդ համաշխարհային պատերազմի հետ։

Հայտարարության տակ ստորագրել են մի քանի տասնյակ թուրք մտավորականներ։