Թուրքիան Սիրիայում ձերբակալել է 2013 թվականին երկրում տեղի ունեցած ահաբեկչության կազմակերպիչներից մեկին

Թուրքիայի ազգային հետախուզական կազմակերպությունը (MIT) ձերբակալել է 2013 թվականին երկրի հարավային Հաթայ նահանգում տեղի ունեցած ահաբեկչության հեղինակներից Մուհամմեդ Դիբ Քորալիին, գրում է Daily Sabah-ը։

Անվտանգության աղբյուրների համաձայն՝ MIT-ը բացահայտել է Սիրիայում Քորալիի թաքստոցը։ Նա Հաթայի Ռեյհանլը շրջանում տեղի ունեցած ահաբեկչությունը ծրագրավորողների թվում է եղել և տրամադրել է հարձակման ժամանակ օգտագործված ռումբերը։ Աղբյուրները հավելել են, որ Քոլարին փոխանցվել է Հաթայի ոստիկանությանը։

Հարձակման պատվիրատուն՝ Մեհմեդ Գեզերը, ձերբակալվել է 2022 թվականին՝ ԱՄՆ-ի կողմից արտահանձնվելուց հետո։ 2018 թվականի փետրվարին Անկարայի դատարանը հարձակման համար 9 հոգու դատապարտել է ցմահ ազատազրկման, ևս 13 հոգի դատապարտվել է 10-ից 15 տարվա ազատազրկման։

2013 թվականի մայիսի 11-ին Ռեյհանլըի պայթյունի հետևանքով մեծ թվով մարդիկ են զոհվել, քանի որ ռումբերով մեքենան պայթեցվել է քաղաքի կենտրոնում։ Երկրորդ մեքենան պայթեցվել է առաջինից հինգ րոպե անց, երբ տասնյակ մարդիկ, այդ թվում՝ քաղաքացիական անձինք, առաջին բուժօգնության ստորաբաժանումները և անվտանգության ուժերը, շտապել էին տարածք՝ օգնելու հարձակման հետևանքով վիրավորներին:

Բացի 53 զոհերից և տասնյակ վիրավորներից՝ հարձակման հետևանքով վնասվել է 912 տուն, 891 ձեռնարկություն և 148 մեքենա:

Թուրք պաշտոնյաները հարձակման համար մեղադրել էին Սիրիայի նախագահ Բաշար Ասադին և սիրիական  ռազմական հետախուզության վարչությանը։

Թարգմանությունը՝ Էմմա Չոբանյանի