Ադրբեջանի կողմից Լաչինի միջանցքի վերջին փակումը սպառնում է վատթարացնել հումանիտար իրավիճակը ԼՂ ժողովրդի համար․ ԵԱՀԿ-ում ԱՄՆ ներկայացուցիչ

Միացյալ Նահանգները ողջունում է Հայաստանի և Ադրբեջանի միջև շարունակվող բարձր մակարդակի հանդիպումները, այդ թվում՝ վերջին եռակողմ հանդիպումը Բրյուսելում հուլիսի 15-ին, ինչպես նաև հունիսի 27-29-ը Վաշինգտոնում ԱԳ նախարարների հանդիպումը: Այս մասին Հայաստանի կողմից հրավիրված ԵԱՀԿ մշտական խորհրդի հատուկ նիստում հայտարարել է կառույցում ԱՄՆ առաքելության գործերի ժամանակավոր հավատարմատար Քեթրին Բրուքերը։

«Պետքարտուղար Բլինքենի խոսքով՝ Հարավային Կովկասում խաղաղության հնարավոր է հասնել։ Խաղաղությունը, երկխոսությունը և հարաբերությունների կարգավորումը Հայաստանի և Ադրբեջանի միջև՝ հիմնված միմյանց ինքնիշխանության և տարածքային ամբողջականության նկատմամբ փոխադարձ հարգանքի վրա, խուսափումը ուժից կամ ուժի սպառնալիքից, սկզբունքներ են, որոնք ամրագրված են Հելսինկյան եզրափակիչ ակտում, մնում են առաջընթացի միակ ճանապարհը։ Մենք ողջունում ենք ձեր ակտիվ աջակցությունն այս նպատակին»,- ասել է նա։

ԱՄՆ դիվանագետը նշել է, որ շարունակում են հավատալ, որ կայուն և արժանապատիվ խաղաղության համաձայնագրի հասնելու, հարաբերությունների կարգավորման, սահմանների սահմանազատման տրանսպորտային և հաղորդակցության կապերի բացման, Լեռնային Ղարաբաղի տարածաշրջանի բոլոր բնակիչների իրավունքների և անվտանգության ապահովման ջանքերը բխում են բոլոր շահագրգիռ կողմերի շահերից:

«Միացյալ Նահանգներն ընդունում է տեղում առկա լարվածությունը, այդ թվում՝ Ադրբեջանի կողմից Լաչինի միջանցքի վերջին փակումը բոլոր մարդասիրական բեռների համար, բացառությամբ սահմանափակ թվով բեռների, ինչը սպառնում է վատթարացնել հումանիտար իրավիճակը Լեռնային Ղարաբաղի ժողովրդի համար: Անդրսահմանային միջադեպերը սպառնում են նաև այն թափին, որին հասնելու համար Դուք արդեն այդքան ջանասիրաբար աշխատել եք: Մենք կրկնում ենք մեր կոչը կողմերին՝ զերծ մնալ սադրիչ, սպառնալից կամ թշնամական գործողություններից կամ հռետորաբանությունից»,- ասել է Բրուքերը՝ արձագանքելով ՀՀ ԱԳՆ Արարատ Միրզոյանի ելույթին։

Նա նշել է, որ անվտանգության վերաբերյալ ԵԱՀԿ համապարփակ մոտեցումը, որը խարսխված է մեր սկզբունքների և պարտավորությունների վրա, կարող է նպաստել ինչպես Հայաստանում, այնպես էլ Ադրբեջանում բարգավաճմանն ու անվտանգությանը՝ որպես համապարփակ խաղաղության համաձայնագրի մաս։

«Պարո՛ն նախարար, Միացյալ Նահանգները հանձնառու է աշխատել Հայաստանի և Ադրբեջանի հետ երկկողմ, բազմակողմ և գործընկերների միջոցով՝ հասնելու տևական և արժանապատիվ խաղաղության»,- ասել է ԵԱՀԿ-ում ԱՄՆ ներկայացուցիչը։

Էմմա Չոբանյան