Կուբանում ԱԹՍ-ների հարվածները վնասել են նավահանգստի ենթակառուցվածքները, Գրոզնիում` Գրոզնի-Սիթի համալիրի շենքերից մեկը. ՏԵՍԱՆՅՈՒԹ

ՌԴ Կրասնոդարի երկրամասում ուկրաինական հարձակման հետևանքով վնասվել է Թեմրյուկի նավահանգստի ենթակառուցվածքը, հայտնել է տարածաշրջանային оպերատիվ շտաբը։ Current time-ի փոխանցմամբ՝ հրդեհ է բռնկվել։ Արտակարգ իրավիճակների ծառայություններն աշխատում են դեպքի վայրում. տուժածներ չկան, անձնակազմը տարհանվել է։

Ռուսաստանի պաշտպանության նախարարությունը հայտնել է տարածաշրջանի վրա մեկ անօդաչու թռչող սարքի խոցման մասին։ Astra-ն, ականատեսների տեսագրությունները վերլուծելով, եզրակացրել է, որ նավահանգստի գազային տերմինալը հրդեհվում է։

Telegram-ի ալիքները նաև Ռամզան Կադիրովի նստավայրից 800 մետր հեռավորության վրա և ԱԴԾ-ի շտաբ-բնակարանի մոտ գտնվող Գրոզնի-Սիթի համալիրի բարձրահարկ շենքում տեղի ունեցած պայթյունի հետևանքները պատկերող լուսանկարներ են հրապարակել։

NYISO-ն պնդում է, որ շենքին անօդաչու թռչող սարք է հարվածել: Ուկրաինական Supernova+ մոնիթորինգային ալիքը նույնպես հաղորդել է բարձրահարկ շենքի վրա հարվածի մասին: Ուկրաինական Exilenova+-ի փոխանցմամբ՝ Գրոզնիում, հավանաբար, աշխատել են ռադիոէլեկտրոնային պայքարի համակարգերը:

Պաշտոնապես իշխանությունները չեն հաստատել երկնաքերի վրա հարձակումը, սակայն առավոտյան Ռոսավիացիան Գրոզնիի օդանավակայանի գործունեության վրա սահմանափակումներ է մտցրել։

Astra-ն, հղում անելով տեղի բնակիչներին, հաղորդում է, որ Սամարայի մարզի Սիզրան քաղաքում անօդաչու թռչող սարքերը հարձակվել են նավթավերամշակման գործարանի վրա: Սիզրանի քաղաքապետ Սերգեյ Վոլոդչենկովը հաստատել է քաղաքի վրա անօդաչու թռչող սարքերի հարձակումը, սակայն որևէ հետևանքների մասին չի հայտնել: Ռուսաստանի պաշտպանության նախարարության տվյալներով՝ Սամարայի մարզի երկնքում խոցվել է ինը անօդաչու թռչող սարք:

Թարգմանությունը՝ Էմմա Չոբանյանի