25.12.2025 | 23:38
Ճապոնիայում 5,6 մագնիտուդով երկրաշարժ է գրանցվել
Ալիևը կրկին խոսել է, այսպես կոչված, «Արևմտյան Ադրբեջանի» համայնքի և նրանց վերադարձի իրավունքի մասին
Քաղաքականություն
05.12.2025 | 11:10
Ադրբեջանի նախագահ Իլհամ Ալիևը հայտարարել է, որ «ադրբեջանական ժողովուրդը, իր պետականության և մշակույթի հին պատմությամբ, վերջին երկու դարերի ընթացքում բազմիցս բախվել է զրկանքների, տեղահանության և ցեղասպանության»։ Այս մասին նա ասել է Բաքվում այսօր ընթացող «Մշակութային ժառանգությունը և վերադարձի իրավունքը. Հայաստանից վտարված ադրբեջանցիների մշակութային ժառանգության վերականգնումը՝ որպես արդարության, հաշտեցման և խաղաղության ուղի» թեմայով 3-րդ միջազգային համաժողովի մասնակիցներին ուղղված ուղերձում։
Ալիևը կրկին խոսել է, այսպես կոչված, «Արևմտյան Ադրբեջանի» համայնքի և նրանց վերադարձի իրավունքի մասին։
«Հայաստանում բնակվող ադրբեջանցիների բռնի տեղահանումը, նրանց ունեցվածքի բռնագրավումը, ինչպես նաև նյութական և մշակութային արժեքների բռնագրավումը, ոչնչացումը և օտարումն այժմ պատմական փաստեր են, որոնք հաստատված են փաստաթղթերով։ Պատմականորեն Հայաստանը ոչնչացրել է Արևմտյան Ադրբեջանում բնակվող ադրբեջանցիների հարուստ նյութական և ոչ նյութական մշակութային ժառանգությունը, նրանց սրբավայրերը և գերեզմանատները՝ իր տարածքից ադրբեջանական ժողովրդի հետքերը ջնջելու համար։ Անհրաժեշտ է քայլեր ձեռնարկել հայերի կողմից ադրբեջանցիների դեմ մարդկության դեմ կատարված հանցագործությունները միջազգային իրավունքի համաձայն գնահատելու համար, և որ միջազգային հանրությունն աջակցի մեզ այս հարցում»,- նշում է Ալիևը։
Նա նաև «տեղահանված» ադրբեջանցիների վերադարձի իրավունքից է խոսել՝ «Մարդու իրավունքների համընդհանուր հռչակագրում, Քաղաքացիական և քաղաքական իրավունքների մասին միջազգային դաշնագրում, Փախստականների կարգավիճակի մասին կոնվենցիայում և այլ կարևոր միջազգային փաստաթղթերում ամրագրված վերադարձի իրավունքի շրջանակում»:
Ըստ նրա՝ «Հայաստանում ադրբեջանական մշակութային ժառանգության վերականգնումն ու պաշտպանությունը ադրբեջանական ժողովրդի օրինական պահանջն է և անհրաժեշտ է համընդհանուր արժեքները հարգելու, թշնամանքի էջը փակելու և ժողովուրդների միջև փոխըմբռնումը խթանելու համար»։
Ալիևն իր ուղերձում նշել է, որ 2025 թվականի օգոստոսի 8-ին Վաշինգտոնում ԱՄՆ-ի միջնորդությամբ Ադրբեջանի և Հայաստանի միջև կայացած հանդիպումը, համատեղ հռչակագրի ստորագրումը և խաղաղության համաձայնագրի նախագծի նախաստորագրումը հույս և վստահություն են ներշնչում երկու ժողովուրդների ապագա համակեցության նկատմամբ։
«Մենք հավատում ենք, որ Արևմտյան Ադրբեջանի համայնքի խաղաղասեր անդամները կվերադառնան իրենց նախնիների հողերը, և մեր ժողովուրդների միջև կհաստատվեն բարիդրացիական հարաբերություններ»,- ասել է Ադրբեջանի ղեկավարը։
Հավելենք, որ վերջերս OC Media-ն հայտնել էր, որ իր ուսումնասիրած արտահոսած փաստաթղթերը բացահայտում են, թե ինչպես է Ադրբեջանի նախագահի աշխատակազմը համակարգում և ֆինանսավորում «Արևմտյան Ադրբեջան» նարատիվի միջազգային տարածումը։
Թարգմանությունը՝ Էմմա Չոբանյանի
