28.10.2026 | 11:44
Թրամփը հայտարարել է Պուտինի ու Զելենսկիի հետ առաջիկա հանդիպման մասին
Շիրակի թեմից ոչ մի քահանա Գյումրիի Յոթ Վերք եկեղեցում կիրակի պատարագ չի մատուցելու․ Նարեկ եպիսկոպոս Ավագյան
Քաղաքականություն
05.12.2025 | 12:22
Նիկոլ Փաշինյանը կիրակի՝ դեկտեմբերի 7-ին, պատարագի է մասնակցելու Գյումրիի Սուրբ Աստվածածին (Յոթ Վերք) եկեղեցում։ Այս մասին վարչապետը հայտարարել է ֆեյսբուքյան տեսանյութի միջոցով։ Ո՞վ է պատարագ մատուցելու այդ օրը։ Հոգևորականի անունն առայժմ հայտնի չէ։ ՀԱԵ Արթիկի թեմի առաջնորդ Տեր Նարեկ եպիսկոպոս Ավագյանը, որը նաև Շիրակի թեմի ժամանակավոր հոգևոր առաջնորդն է Միքայել արքեպիսկոպոս Աջապահյանի կալանավորումից հետո, Factor.am-ին փոխանցեց, որ տեղեկություններ չունի՝ ով է պատարագը մատուցելու։
«Ինձ ոչ մի բան չի ասվել։ Շիրակի թեմից էլ ոչ ոք չի պատարագելու։ Յոթ Վերքում պետք է պատարագեր Տեր Գառնիկը։ Իր առաջին պատարագն էր, բայց նա պատարագ կմատուցի Սուրբ Ամենափրկիչ եկեղեցում»,-ասաց թեմի առաջնորդը։ Ստացվում է՝ քահանային այլ թեմից են տանելու։ Հիշեցնենք՝ անցնող շաբաթվա ընթացքում, այդ թվում՝ ԱԱԾ-ի ազդեցությամբ, իշխանավորները փորձում էին հասնել նրան, որ Գյումրիի քահանաներից տեր Ռուբենը մատուցի պատարագը՝ կաթողիկոսի անունը զեղչելով։ Քահանան դեմ չէր պատարագ մատուցել, սակայն հրաժարվել է Փաշինյանի ցանկությունը կատարել ու զեղչել Գարեգին Բ-ի հիշատակումը։
Փաշինյանը երեկ Factor TV-ի հարցին ի պատասխան՝ հաստատել էր, որ ԱԱԾ-ն էլ է միջամտում, որ պատարագին կաթողիկոսի անունը չտրվի, սակայն վարչապետը դա ոչ թե ճնշում, այլ խնդրանք էր ներկայացրել։
Նարեկ Կիրակոսյան
