Պուտինն այլևս չի՛ գա ՀՀ․ մանկագո՛ղ է՝ կալանավորելու որոշում է կայացված, նա հետախուզվում է․ Ռուբեն Մեհրաբյան․ ՏԵՍԱՆՅՈՒԹ

Factor TV–ի հարցազրույցը «Հանուն Հանրապետության» կուսակցության փոխնախագահ Ռուբեն Մեհրաբյանի հետ

-Նիկոլ Փաշինյանը շուրջ երեք ժամ խոսեց 44-օրյա պատերազմի հանգամանքներն ուսումնասիրող հանձնաժողովի նիստում և այդպես էլ որևէ գնահատական չտվեց պատերազմի ժամանակ Հայաստանի ռազմավարական դաշնակից Ռուսաստանի գործողություններին։ Փաշինյանը միտումնավոր թաքցրե՞ց ՌԴ-ի գործոնը, թե՞ իրոք Ռուսաստանը որևէ բացասական դերակատարում չի ունեցել։

-Այո՛, շուրջ երեք ժամ խոսեց Փաշինյանը և շատ կարևոր բաներ ասվեցին, նաև վաղուց ասված բաներ, որոնք ասել էին շատ վերլուծաբաններ, քաղաքական գործիչներ՝ գործող և նախկին։ Եվ, ըստ էության, Փաշինյանը հրապարակային ցուցմունք տվեց քննիչ հանձնաժողովին, դա կարևոր իրադարձություն է ՀՀ-ի ժողովրդավարության առումով։ Նա իր ելույթում ժամանակագրական կարգով դասավորեց այն իրադարձությունները, որոնք եղել են պատերազմի ժամանակ, նաև անդրադարձ կատարեց բանակցային գործընթացի առանցքային կետերին։ Իրադարձությունների պատճառահետևանքային կապերը, ըստ էության, վեր են հանում Ռուսաստանի կողմից Հայաստանի դեմ տարված և տարվող հիբրիդային պատերազմը՝ ամբողջության մեջ, իր գործիքակազմով։

-Բայց Փաշինյանն անգամ չակնարկեց այդպիսի գործընթացի մասին։

-Փաշինյանը, սակայն, չասաց, թե ում շահերի շրջանակում էր այդ ամբողջ գործընթացը տեղի ունենում, և ով էր այս գործընթացների կարևոր շահառուն, և ինչու էին դեպքերը զարգանում հենց այդ տրամաբանության մեջ։ Ի վերջո, դրանք գործողություններ էին, որոնք Ռուսաստանը կատարում էր՝ թե՛ անմիջականորեն, թե՛ իր պրոքսիների միջոցով, որոնց դրել էր Հայաստանում որոշում ընդունող պաշտոնների։ Այնպես չէ, որ ռուսական պրոքսիները Հայաստանում կամ այն հակասոցիալական խաժամուժը, որ կոնսոլիդացվում էր նրա շուրջ, ինքնուրույն էին այդ ամենը կատարում, մտմտում կամ դա իրենց թույլատրվում էր ինքնուրույն կատարել։

Այո՛, Նիկոլ Փաշինյանը չասաց գլխավորի մասին։ Հունիսի 27-ին լինելու է խոսակցության շարունակությունը, և կա հնարավորոթյուն, որ այդ կարևոր հարցերը բարձրաձայնվեն։ Ես, որպես ՀՀ քաղաքացի, խնդրում եմ ձեզ՝ որպես լրատվամիջոցի, հարցեր նախապատրաստեք և հասցեագրեք քննիչ հանձնաժողովին, պատվիրակեք նրանց, այդ հարցերի մասին բարձրաձայնել։

Հարցազրույցն ամբողջությամբ՝ տեսանյութում։

Ռոբերտ Անանյան