Ժողովուրդը իմունիտետ է ձեռք բերել՝ հոգեբանական գրոհների․ չի ստացվելու․ Արսենյանը՝ ընդդիմությանը․ ՏԵՍԱՆՅՈՒԹ

ԱԺ-ում շարունակում է քննարկվել ՀՀ 2022 թվականի պետական բյուջեի տարեկան հաշվետվությունը:

Ժողովուրդը իմունիտետ է ձեռք բերել՝ հոգեբանական գրոհների․ չի ստացվելու․ Արսենյանը՝ ընդդիմությանը։

«Գալիս այստեղ պաթետիկ ելույթներ եք ունենում, դրա ֆոնին երկխոսություն, բառախաղեր. լավ, ինչքա՞ն կարելի է շարունակել, երկու տարի է՝ նույն բանն է: Իրացրեք հասարակության կողմից ձեզ տրված քվեն, ինչքա՞ն կարելի է հույսը դնել Գեղամի պաթետիկ ելույթների վրա»,- այսօր՝ հունիսի 15-ին, ԱԺ-ում ՀՀ 2022 թվականի պետական բյուջեի տարեկան հաշվետվության քննարկմանը հայտարարեց ՔՊ խմբակցության պատգամավոր Գուրգեն Արսենյանը՝ դիմելով խորհրդարանական ընդդիմությանը:

Իշխանական պատգամավորը նշեց, որ իրենց կարող են մեղադրել ոչ թե Ալիևի հայտարարությունների համար, այլ նրա համար, որ մեր կողմից բանակցողը՝ վարչապետը, եթե երկխոսության ժամանակ ասածին պատասխան չտա. «Բայց բոլորդ էլ ականատես եք լինում, չէ՞, որ այդ պատասխանները կան, այդ պատասխաններում երկրի շահերի սպասարկման ակնհայտ միտումը կա, մեր կողմից բանակցողը նաև միտումնավոր երկիրը չի տանում կոնֆլիկտի, որովհետև նրա կարևորագույն առաքելությունն այն է, որ երկիրը զերծ պահի ցնցումներից»:

Գուրգեն Արսենյանը հիշեցրեց նաև նոյեմբերի 9-ից հետո ներքին հարձակումը մեր պետական ինստիտուտների նկատմամբ:

«Պարո՛ն Օհանյան, մի օր վիճակագրական տվյալները վերցրեք ձեր ձեռքի տակ և եկեք այս ամբիոնից «նոկաուտ» արեք այն ընդդիմախոսին, որ ասում էր՝ բանակի սպառազինությունը չէր համապատասխանում այն պատկերացումներին, որ մենք ունեինք. եկեք ասեք, ինչի՞ չեք ասում»,- նշեց պատգամավորը:

Արսենյանի դիտարկմամբ՝ մեր ժողովուրդն իմունիտետ է ձեռք բերել՝ իրականացվող հոգեբանական գրոհների նկատմամբ․ «Շատ լավ հասկանում է՝ ինչ է խաղաղությունը, ինչ են նշանակում այդ խաղաղությանն ուղղված ջանեքրը, հարևանների հետ խաղաղ գոյակցության հնարավորությունը, և շատ լավ հասկանում է՝ ինչ է ազգամիջյան հրահրումը, և էլ երբեք չի տրվելու այդ պրոցեսին։ Այդ պրոցեսի ճարտարապետները պետք է հասկանան, որ չի ստացվելու»։

Մանրամասները՝ տեսանյութում։