Բանանի շուկայում մենաշնորհ չի եղել․ այժմ կան գերիշխող դիրք ունեցողներ․ ՄՊՀ անդամի թեկնածու․ ՏԵՍԱՆՅՈՒԹ

Ազգային ժողովում քննարկվում է Մրցակցության պաշտպանության հանձնաժողովի անդամի ընտրության հարցը։ ԱԺ «Պատիվ ունեմ» եւ «Հայաստան» խմբակցությունները հանձնաժողովի անդամի պաշտոնում առաջադրել են Անահիտ Սարգսյանի թեկնածությունը։

«Ես չգիտեմ՝ դուք ինչ գրառում եք ասում, ես չեմ կարծում, որ իմ Facebook-ում նման գրառում կա, սակայն, այն պահին, երբ մենք կորցնում ենք Արցախի Հանրապետությունը․․․, այդ դեպքում ես կարող եմ խնդիրներ ունենալ այն ժողովրդի հետ, որը հանգեցերց դրան», – նշեց Անահիտ Սարգսյանը՝ ի պատասխան Վահագն Ալեքսանյանի դիտարկման, որի համաձայն՝ Սարգսյանը Facebook-ում գրել է. «Բա, ոչխա՛ր ժողովուրդ, մերժեցիք Սերժին, բերեցիք Նիկոլին, հիմա չե՞ք երազում Սերժի Հայաստանը»:

Անահիտ Սարգսյանն էլ հայտարարեց, թե ինքը, որպես ՀՀ քաղաքացի, ունի իր կարծիքը տեղի ունեցող երևույթների վերաբերյալ, մասնավորապես, պետության, պետության ամրության, պետության ղեկավարների, ղեկավարների վարած քաղաքականության: Նա նաև հավելեց, որ ԱԺ-ում ֆեյսբուքյան ստատուսներ հրապարակելն այնքան էլ ազնիվ չէ։

Մեջբերելով թեկնածուի պատասխանը, թե 2017 թվականին մենաշնորհ չի եղել, Ալեքսանյանը հարցրեց. «Ձեր պատասխանը պայմանավորված է նրանով, որ դուք շարունակում եք կարծել, թե ՀՀ ժողովուրդը ոչխա՞ր է ու լա՞վ չի հասկանում, թե դուք ինչ եք ասում: Եթե հայ ժողովրդին համարում եք ոչխար, ո՞նց եք էդ ժողովրդի ձևավորած ԱԺ-ից եկել քվե ուզում, ու ո՞նց եք պատկերացնում, որ դուք էդ ժողովրդի մեջ պետք է ղեկավար պաշտոն զբաղեցնեք»:

«Բանանի շուկայում մենաշնորհ չի եղել, եղել են և այժմ կան գերիշխող դիրք ունեցողներ»,- նշեց Սարգսյանը։

«Ինձ թվում էր, թե դուք ներողություն պետք է խնդրեիք ՀՀ ժողովրդից, բայց դուք ավելի հեռուն գնացիք: Որևէ մեկը չի կարող խնդիր ունենալ ՀՀ ժողովրդի հետ»,- ասաց Ալեքսանյանը։

Մանրամասները՝ տեսանյութում։