06.06.2026 | 20:00
Ում ենք ընտրում չընտրելով․ քվեարկության չԳնալու ՇԵՐՏԵՐԸ. ՏԵՍԱՆՅՈՒԹ
Կախովկա ՀԷԿ-ի ամբարտակի փլուզումը սպառնալիք է պարենային անվտանգությանը․ ՄԱԿ
Քաղաքականություն
13.06.2023 | 22:17
Կախովկա հիդրոէլեկտրակայանի ամբարտակի ոչնչացումը լրջորեն կազդի համաշխարհային պարենային անվտանգության վրա՝ հանգեցնելով գների բարձրացման։ Այս մասին հայտարարել է ՄԱԿ-ի գլխավոր քարտուղարի հումանիտար հարցերով տեղակալ Մարտին Գրիֆիթսը, գրում է DW-ի ռուսական ծառայությունը։
«Մենք արդեն դժվարություններ ունենք պարենային անվտանգության հետ կապված, սակայն համոզված եմ՝ ապրանքների գներն անպայման կաճեն»,- ասել է նա։
Գրիֆիթսը նաև նշել է, որ տեխնածին աղետը սպառնում է հարյուր հազարավոր մարդկանց խմելու ջրի հասանելիության հետ կապված խնդիրներ ստեղծել։ Ըստ նրա՝ նման մասշտաբով քաղաքացիական ենթակառուցվածքի օբյեկտի ոչնչացումը հակասում է միջազգային մարդասիրական իրավունքին։
«Նա, ով արել է դա, խախտել է Ժնևի կոնվենցիաները»,- ասել է ՄԱԿ-ի ներկայացուցիչը։
Հիշեցնենք, որ Կախովկա ՀԷԿ-ում, որն արդեն մեկ տարուց ավելի վերահսկում են ռուս զինվորականները, հունիսի 6-ի առավոտյան պայթյունից հետո ջրի անվերահսկելի արտահոսք է տեղի ունենում, ինչի հետևանքով բազմաթիվ բնակավայրեր հեղեղվել են։ Կիևը հայտարարել է, որ ռուսական զորքերն են պայթեցրել ՀԷԿ-ի ամբարտակը։ ՌԴ-ն հերքում է՝ փոխարենը տեղի ունեցածի համար մեղադրելով ուկրաինական կողմին։
Էմմա Չոբանյան
