Հասարակություն
13.06.2023 | 12:12Ոստիկանության կենտրոնական բաժնում փաստաբան Կարեն Ալավերդյանի նկատմամբ ոստիկանների կողմից բռնություն է կիրառվել, նա ձերբակալվել է: Այսօր հրավիրված ասուլիսում Կարեն Ալավերդյանը պատմել է, որ հունիսի 7-ին՝ ժամը 16:00-ին, ինքն իր պաշտպանյալի հետ Երևան քաղաքի ընդհանուր իրավասության դատարանի Կենտրոն նստավայրում մասնակցել են քրեական գործով նշանակված դատական նիստի, որի ընթացքում պաշտպանյալի և նրա ընկերոջ միջև ընկերական նեղվածության հարցերի շուրջ առաջացել է խոսակցություն, որը, փաստաբանի գնահատմամբ, չի կարող պարունակել հանցակազմի հատկանիշներ.
«Դատական նիստը հետաձգվել է վկաների՝ չներկայանալու պատճառով: Նիստից հետո ես ու պաշտպանյալս հանգիստ քայլում էինք դատարանի դիմացի մայթով, երբ մեզ մոտեցան 20-30 ոստիկաններ և պարեկներ՝ տարբեր բաժիններից: Նրանք ցուցաբերելով ոչ արհեստավարժ մոտեցում՝ տևական ժամանակ չէին կարողանում բացատրել իրենց մոտենալու նպատակը, թե այդ մեծաքանակ ծառայողներից ով կոնկրետ ինչ դատավարական գործողություն է պատրաստվում իրականացնել և այլն:
Ի վերջո հասկացա, որ ոստիկանները պաշտպանյալիս հրավիրում են ոստիկանական բաժին: Ես պահանջել եմ նրան կողմից կատարվող գործողությունների փաստական և իրավական հիմքերը, և որ ծառայողի հետ ենք գործ ունենալու, սակայն այդ ամենը պարզել չի հաջողվել, այնուհետև պաշտպանյալս ցանկություն է հայտնել ներկայանալ ոստիկանական բաժանմունք, և խնդրել է, որ ես, որպես փաստաբան, հետևեմ իրեն՝ իրավաբանական աջակցություն ցուցաբերելու նպատակով: Նա առանց հարկադրանքի նստել է պարեկային ծառայողների ավտոմեքենան: Հատկանշական է, որ գործողությունն իրականացրել են պարեկներ, որոնց վրա ամրակցված են տեսախցիկներ, և այդ ամենը ֆիքսված պետք է լինի: 5 րոպե անց ներկայացել եմ ոստիկանական բաժին, նշել եմ այցիս նպատակը, ներկայացրել վկայականը»:
Փաստաբանի խոսքով՝ բաժնում 5-10 րոպե ամեն կերպ արհեստական խոչընդոտներ են ստեղծել՝ իր պաշտպանյալի մոտ բարձրանալու համար. «Համառ պայքարից հետո ինձ հաջողվեց բարձրանալ նրա մոտ: Դրսից լսեցի պաշտպանյալիս գոռոցները, և իրեն չհարվածելու պահանջները:
Նախ ոստիկանության երկու ծառայողներ փորձեցին ինձ խոչընդոտել, որ բացեմ աշխատասենյակի դուռը: Ես հաղթահարելով նրան արգելքները՝ բացեցի դուռը և հայտնաբերեցի պաշտպանյալիս՝ գետնին ընկած, ձեռնաշղթաները հետևից ամրացված և ոստիկանության 5-6 ծառայողներ միաժամանակ նրան հարվածներ էին հասցնում: Մոտեցել եմ պաշտպանյալիս, նրան բարձրացրել եմ գետնից, փորձել եմ արգելել, կանգնել եմ ձեռքերս նրա վրա պարզած: Նրանց հորդորել եմ պաշտպանյալիս հետ երկխոսության մեջ չմտնել, քանի որ նրանց մոտեցման և խոսակցության մակարդակը նման էր փողոցային . «ռազբորկայի»: Իմ պահանջով ոստիկանները դուրս եկան սենյակից, որ մնա դատավարական գործունեություն իրականացնող ծառայողը»:
Ալավերդյանը պատմեց նաև, որ կարճ ժամանակ անց բռնությունը կրկնվել է. «Ես մի պահ ծխախոտ եմ ծխել, շատ հանկարծակի ոստիկանության նշված ծառայողը սկսել է գոռալ պաշտպանյալիս վրա և անմիջապես նորից դուռը բացվել է, ու այդ նույն խումբը մուտք է գործել աշխատասենյակ՝ ինձ մի կողմ հեռացնելով: Ինձ աշխատասենյակից դուրս բերելուց հետո ագրեսիվ պահանջներ են ներկայացրել՝ ոստիկանական շենքը թողնելու: Ես առարկել եմ ամեն կերպ, փորձել եմ վերադառնալ պաշտպանյալիս մոտ, իմ նկատմամբ հանկարծակի կիրառվել է անհարկի ֆիզիկական ուժ: Իմ կողմից որևէ հակաիրավական գործողություն չի կատարվել, որի հիմնավոր կասկածով իմ նկատմամբ ձերբակալում իրականացվեր:
Առանց որևէ հիմքի իմ նկատմամբ իրականացվել է անհարկի ֆիզիկական ուժի գործադրում, ձերբակալվել եմ, կիրառվել է ձեռնաշղթա և հատուկ միջոցներ: Ինձ ձերբակալման գործընթացի հետ կապված՝ թույլ են տրվել բոլոր հնարավոր խախտումները: Կար հիմնավոր կասկածի բացակայություն, նշվում է փախուստի դիմելու մասը. ի՞նչ փախուստի մասին կարող է խոսք լինել, եթե ես ամեն կերպ փորձում էի վերադառնալ պաշտպանյալիս մոտ, ձերբակալման արձանագրությունը կազմվել է ինձ արգելանքի վերցնելուց 50 րոպե անց, այն պարագայում, երբ հետաքննական մարմնում եղել են բազմաթիվ աշխատակիցներ և որևէ օբյեկտիվ պատճառ չի եղել ձերբակալման արձանագրությունը այդքան ժամանակային խզումով կազմելու համար, ինձ չի հանձնվել ձերբակալման պատճենը։ Փաստաբանների պալատի նախագահին չի տեղեկացվել իմ ձերբակալման մասին և այլն»:
Ալավերդյանը հավելեց, որ ձերբակալման առավելագույն 6 ժամը լրանալուց հետո քննիչն իրեն ազատ արձակելու մասին որոշում է կայացրել:
Մանրամասները՝ տեսանյությում։
