18.03.2026 | 23:19
1-ամյա երեխայի սպանության փորձ կատարելու մեջ մեղադրվող խորթ մայրը կալանավորվեց
ԲԱՆԱՎԵՃ․ ԱՄՆ-ում Միրզոյան-Բայրամով հանդիպումն ի՞նչ արդյունք տվեց․ ՌԴ-ն՝ բանակցության հաջորդ կանգառը
Քաղաքականություն
05.05.2023 | 19:17
Վաշինգտոնում Հայաստանի և Ադրբեջանի պատվիրակությունները քառօրյա բանակցություններն ամփոփեցին հայտարարությամբ, որ համաձայնագրի նախագծի որոշ հոդվածների շուրջ ձեռք է բերվել փոխըմբռնման առաջընթաց՝ միևնույն ժամանակ արձանագրել են, որ մի շարք առանցքային հարցերի շուրջ դիրքորոշումները մնում են տարամետ:
Հայ-ադրբեջանական բանակցություններն ընդունած ԱՄՆ պետքարտուղար Էնթոնի Բլինքենը եզրափակիչ նիստին ասել է․ «Երկկողմ և եռակողմ քննարկումների ինտենսիվ և կառուցողական շարքից հետո կողմերը զգալի առաջընթաց են գրանցել բարդ խնդիրների լուծման գործում։ Ե՛վ Հայաստանը, և՛ Ադրբեջանը սկզբունքորեն համաձայնել են որոշակի պայմանների և ավելի լավ են պատկերացնում միմյանց դիրքորոշումները չլուծված մնացող հարցերի վերաբերյալ»։
Ամերիկացի պաշտոնյան առաջարկել է հայ և ադրբեջանցի նախարարներին վերադառնալ սեփական մայրաքաղաքներ՝ իրենց կառավարությունների հետ կիսելու այն հեռանկարը, որ հավելյալ բարի կամքի, ճկունության և փոխզիջումների դեպքում համաձայնությունը հասանելի է։
«Կարծում եմ՝ բանակցությունների տեմպը և մեր գործընկերների կառուցած հիմքը ցույց են տալիս, որ խաղաղության համաձայնագիրն իսկապես հասանելի է մեզ: Ցանկացած մարաթոնի վերջին մղոնը միշտ ամենադժվարինն է: Մենք դա գիտենք: Սակայն ԱՄՆ-ն այստեղ է՝ շարունակելու օգնել մեր երկու բարեկամներին հատել վերջնագիծը: Ես կարծում եմ, որ մենք շատ մոտ ենք դրան»,- ասել է Էնթոնի Բլինքենը։
Վաշինգտոնում հայ-ադրբեջանական բանակցությունների ֆոնին Հայաստանի վարչապետը Պրահայում հայտարարեց՝ անորոշ է ԼՂ-ի ժողովրդի անվտանգության և իրավունքների երաշխավորման մեխանիզմը, անորոշ է նաև Ստեփանակերտ-Բաքու երկխոսության ձևաչափը։ Նա տեղեկացրեց, որ մինչ այս պահը հնարավոր չի եղել համաձայնեցնել նաև խաղաղության պայմանագրի տեքստի մեկնաբանության հարցում տարակարծությունները հաղթահարելու մեխանիզմները։ Չկա նաև որևէ համաձայնություն խաղաղության պայմանագրի իրագործման միջազգային մեխանիզմների հարցում: Ի դեպ, դեռ ԱՄՆ-ի բանակցությունները չէին ավարտվել, Ալիևը և Փաշինյանը հայտնել էին Մոսկվայում բանակցելու հավանական սցենարի մասին։
Ինչպե՞ս գնահատել հայ-ադրբեջանական վաշինգտոնյան բանակցությունները, արդյո՞ք դրանք քայլ առաջ էին։ Ի՞նչ սպասել Մոսկվայի հանդիպումից։ Factor TV-ի կազմակերպած բանավեճին մասնակցում են «Լուսավոր Հայաստան» կուսակցության անդամ Դավիթ Խաժակյանը, «Ժողովրդավարական համախմբում» կուսակցության ղեկավար, քաղաքագետ Սուրեն Պետրոսյանը, Հայաստանի Եվրոպական կուսակցության ղեկավար Տիգրան Խզմալյանը, քաղաքական վերլուծաբան Արմեն Հովհաննիսյանը։
