Ոստիկանը դեմքիս արցունքաբեր գազ փչեց՝ դեպքին միջամտելու փոխարեն. Կարեն Հակոբյան. ՏԵՍԱՆՅՈՒԹ

«Ես գրեթե վստահ էի, որ բարեփոխումներ են եղել ոստիկանության համակարգում, ամեն ինչ արվել է, որպեսզի քաղաքացին վստահի ոստիկաններին, սակայն այդ օրը ես հասկացա, որ այն ոստիկանները, որոնց հետ առնչվել եմ, իրավունքներից տեղյակ չեն, և բոլորովին այլ կերպ են հասկանում օրենք հասկացությունը»,- «Ոստիկանության քրոնիկոն. մարդու իրավունքների զանգվածային ոտնահարումը շարունակվում է» թեմայով քննարկման ժամանակ այս մասին նշեց հասարակական գործիչ Կարեն Հակոբյանը՝ անդրադառնալով «Պոլիգրաֆ» ակումբում տեղի ունեցած միջադեպի ժամանակ ոստիկանության իրականացրած գործողություններին։

«Դեպքը արտառոց էր․․․ Ակումբներից մեկում մենք մշակութային տարբերությունների մասին խոսելիս հայհոյանքի արժանացանք, ես արտերկրից հյուրեր ունեի, որոնց հայկական պանյատկեքը բացատրելու ժամանակ չկար։ Որպեսզի խուսափեինք կռվից, զանգահարեցի ոստիկանություն։
Ոստիկնության գալուց հետո, նախ նրանք գրկախառնվեցին ակումբի տիրոջ հետ։ հետո սպասում էին, որ հայհոյանքներին արձագանքեմ, որպեսզի հիմք ունենան ձերբակալելու․․․ Ծեծկռտուք առաջացավ․․․ Ես հարցրեցի՝ արդյոք օրինական է, որ հայհոյանքներ են հնչեցնում, ոստիկանը դեպքին միջամտելու փոխարեն գազ փչեց աչքերիս, երեք-չորս ժամ կուրացել էի․․․

Ես արդեն գիտեի, որ իրավազուրկ եմ, քանի որ ինձ կուրացնելուց ոչ մի իրավունք հաշվի չէին առել, հեռախոսս ձեռքիցս վերցրել էին՝ առանց հիմնավորելու։
Ես իմ լիտվացի հյուրերին ոչ մի կերպ չկարողացա բացատրել, թե ինչ տեղի ունեցավ ոստիկանության գալուց հետո։

Ոստիկաններն ինձ տարան բաժին, 4 հարկ գլորելով, քաշքշելով, վիրավորելով ու հայհոյելով գցեցին ինչ-որ տեղ, շոշափելով հասկացա, որ աթոռի վրա․ ունեի մի նպատակ՝ կարողանալ համբերատար դիմանալ ցավին, սարսափելի ցավեր ունեի դեմքիս, և սպասել օգնության՝ ակնկալում էի, որ ընկերներս փաստաբան կուղարկեն։ Ոստիկանությունը հրաժարվում էր փաստաբանի հարցով ինչ-որ բան անել, հեռախոսազանգի մասին խոսք չկար։ Ջուր խնդրեցի, ասացին, որ արժանի չեմ, խուլիգան եմ․․․ Ընթացքում մարդիկ էին մտնում այդ սենյակ և ինձ վիրավորում էին, չէի արձագանքում, քանի որ հասկանում էի, որ կտտանքների կարող եմ ենթարկվել և չէի կարողանալու դա հետո ապացուցել․ սա տևեց 4-5 ժամ, մինչև փաստաբան եկավ։ Ներկայացավ նաև մեկը, որպես բժիշկ, որպեսզի ստուգեն իմ խմածությունը։
Ես հենց որ սկսեցի տեսնել, նկատեցի՝ ոստիկանը նստած ծխում էր և հեռախոսով խաղ խաղում․․․

Ես համարվում էի ոչ թե բերման ենթարկված, այլ ձերբակալված․․․ Նշանակում է հետընթաց ենք ապրել օրենսդրության մեջ, ռեպրեսիվ մեխանիզմներ են գործում»,- նշեց Հակոբյանը։

Նշենք, որ ապրիլի 23-ին տեղեկություններ են հրապարակվել առ այն, որ «Պոլիգրաֆ» ակումբում իրականացված գործողությունների հետևանքով մոտ 41 անձ ձերբակալվել է։ Ըստ հրապարակված տեղեկությունների՝ տվյալ ակումբում գտնվող անձանց նկատմամբ ոստիկանության ծառայողները դրսևորել են վատ վերաբերմունք։

Մանրամասները՝ տեսանյութում։