Միտումնավոր չեն տրամադրում ԶԼՄ-ների հարցման պատասխանները. Աշոտ Մելիքյան․ ՏԵՍԱՆՅՈՒԹ

Ընթացիկ տարվա առաջին եռամսյակում լրագրողների նկատմամբ որևէ ֆիզիկական բռնության դեպք չի արձանագրվել: Այս մասին նշեց Խոսքի ազատության պաշտպանության կոմիտեի նախագահ Աշոտ Մելիքյանը՝ ներկայացնելով 2023 թվականի առաջին եռամսյակի զեկույցը՝ Հայաստանում խոսքի ազատության վիճակի և լրագրողների ու ԶԼՄ-ների իրավունքների խախտումների վերաբերյալ:

«Սա հազվագյուտ եռամսյակներից է, որ իսկապես բռնություններից զերծ են մնացել մեր գործընկերները: Իհարկե, պետք է նշել, որ առաջին եռամսյակի ընթացքում հասարակական, քաղաքական իրավիճակն էլ լարված չի եղել: Նախորդ ժամանակներից գիտենք, որ երբ երկրում սրվում է իրավիճակը, ապա ակցիաներ են անցկացվում, այդ ժամանակ բարդանում է նաև լրագրողների գործունեությունը»,-ասաց Աշոտ Մելիքյանը:

Բացասական միտումներ են նկատվում տեղեկություններ ստանալու և տարածելու իրավունքի հետ կապված: Մասնավորապես, ընթացիկ տարվա առաջին եռամսյակում այդ իրավունքի խախտման 49 նման դեպք է գրանցվել՝ նախորդ տարվա նույն ժամանակահատվածի 45-ի դիմաց:

«2020 թվականից ի վեր որևէ եռամսյակում այսպիսի քանակի խախտում՝ կապված տեղեկություններ ստանալու և տարածելու իրավունքի խախտումների հետ չի արձանագրվել: Սա նշանակում է, որ պետական մարմիններից հատկապես տեղեկություններ ստանալը բարդանում է: Պետական մարմինները կամ չեն պատասխանում գրավոր հարցումներին, կամ պատասխանում են լղոզված՝ բոլոր հարցումներին չանդրադառնալով»,-ասաց Աշոտ Մելիքյանը:

Նրա խոսքով՝ լրագրողների բողոքներն այս ուղղությամբ ավելացել են: Ուսումնասիրությունները ցույց են տալիս, որ լրագրողները որպես կանոն փորձում են ստանալ տեղեկատվություն, որոնք պետական գաղտնիք չեն պարունակում, սակայն անտեղի հղում անելով այս կամ այն գաղտնիքների մասին օրենքին, գերատեսչությունները տեղեկությունը չեն տրամադրում կամ տալիս են թերի պատասխան:

«Այստեղ մենք ուղիղ կապ ենք տեսնում կոռուպցիայի ինդեքսի փոփոխության առումով: Տարեսկզբին «Թրանսփարենսի Ինթերնեշնլ» միջազգային կազմակերպությունը զեկույց էր հրապարակել, ըստ որի աշխարհում կոռուպցիայի ընկալման համաթվում Հայաստանի վարկանիշն իջել է՝ երկիրը նախորդ տարվա 58-րդ տեղից հայտնվել է 63-րդ տեղում: Նման հետընթացը կանխատեսելի էր, քանի որ կոռուպցիայի դեմ պայքարը սկսվում է տեղեկատվության ազատությունից»,-ասաց Աշոտ Մելիքյանը:

Ինչ վերաբերում է լրագրողների ու լրատվամիջոցների նկատմամբ հարուցված դատական հայցերին, ապա ընթացիկ տարվա առաջին եռամսյակում ներկայացվել է 8 նոր դատական հայց, որոնցից 1-ը բիզնես ոլորտի ներկայացուցչի կողմից է, 7-ը՝ նախկին ու ներկա աշխատողների:

Մանրամասները՝ տեսանյութում։