Եթե Ադրբեջանի զինվորը մոլորվել, հասել էր Ազատ` դիվերսիա էլ կարող էր լինել. ՏԵՍԱՆՅՈՒԹ

Ազատ գյուղի զորամասի կացարանում մահացած զինծառայողների ծնողների կողմից կառավարությունում տեղի ունեցած հանդիպմանը համապարփակ ներկայացվել է համապատասխան պաշտոնյաներին իրենց պահանջներ, վերջիններիս կողմից խոստացվել է ներկայացնել տեղեկատվության հանդիպման հնարավորության մասին:
«Պահանջում ենք հնարավորինս շուտ հանդիպում վարչապետի հետ,- լրագրողների հետ զրույցում նշեց մահացած զինծառայողներից մեկի հայրը։

Նա ուշադրություն հրավիրեց դեպքին հաջորդած կառավարության նիստում Փաշինյանի հնչեցրած հայտարարությունների վրա. «Վարչապետն այնպես հայտարարություն արեց, ոնց որ անձամբ եղել դեպքի վայրում։ Հետո ասաց՝ առանձնապես պարզելու բան էլ չկա»։

Անդրադառնալով հարցին, թե զինվորները մինչև հրդեհի դեպքը արդյո՞ք երբևէ դիվերսիոն փորձերի մասին պատմել են, նշեց․ «Դիվերսիոն փորձերի մասին չեն պատմել, բայց պատմել են, որ ադրբեջանցի զինծառայող են բռնել գյուղում։ Եթե Ադրբեջանի զինվորը մոլորվել, հասել էր Ազատ գյուղ, դիվերսիա էլ կարող էր լինել»։

Հիշեցնենք՝ հունվարի 19-ին՝ ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երևան՝ Այրվածքաբանության ազգային կենտրոն:

Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը և ևս 7 բարձրաստիճան զինվորականներ։

Հրդեհի դեպքի առնչությամբ նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու և ավելի անձի մահ)։

Մանրամասները՝ տեսանյութում։