Պատը կծակեին, դուրս կգային. ո՞նց է հնարավոր ձայներից չզարթնեին․ ՏԵՍԱՆՅՈՒԹ

Վառողն ո՞վ է եղել, թող բացահայտեն, արդար դատաքննություն անեն: Ո՞վ որոշեց, որ մեր երեխեքը պետք է չապրեն:Այս մասին այսօր՝ փետրվարի 20-ին, ՊՆ-ի շենքի դիմաց բողոքի ակցիայի ժամանակ լրագրողների հետ զրույցում նշեց հունվարի 19-ին Ազատ գյուղի զորամասի կացարանում մահացած զինվորներից մեկի՝ Գոռ Մարտիրոսյանի մայրը:

«Մենք չենք հավատում, որ մեր երեխքը հրդեհից են մահացել․․․ Մեր երեխեքը դուրս էին գալու, թեկուզ գլուխ, ձեռք ու ոտք վառվելով դուրս էին գալու: Մենք ոչ մի զոհ չէինք ունենալու: Նրանք պատն էլ կծակեին, բայց դուրս կգային»,- նշեց մահացած զինծառայողի մայրը:

Մեկ այլ ծնող հավելեց. «Իմ երեխեն 12․30 արթուն է եղել, ո՞նց կարող էր 10 րոպեում էդքան խորը քներ, ձայներից չզարթներ։

15 երեխու արյունն իրենք չեն մարսելու: Մենք չենք հավատում, ի՞նչ բերին, մեզ տվին, մոխրացած մարմիննե՞ր: Ամեն վայրկյան սպասում ես, որ հեսա դուռը կբացվի, երեխեդ կգա, հեռախոսը կզանգի: Ես հայ մայրերին կոչ եմ անում՝ չթողե՛ք ձեր երեխեքը գնան ծառայելու, որ մեր վիճակում չհայտնվեն»:

Հիշեցնենք՝ հունվարի 19-ին՝ ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երևան՝ Այրվածքաբանության ազգային կենտրոն:

Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը և ևս 7 բարձրաստիճան զինվորականներ։

Հրդեհի դեպքի առնչությամբ նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու և ավելի անձի մահ)։

Մանրամասները՝ տեսանյութում։