Մեր երեխեքի արյունը չեն մարսելու. ամեն վայրկյան սպասում ենք, որ կգան․ ՏԵՍԱՆՅՈՒԹ

Գեղարքունիքի մարզի Ազատ գյուղի զորամասի ինժեներասակրավորային վաշտի կացարանում մահացած 15 զինծառայողների ծնողներն այսօր բողոքի ակցիա են իրականացնում Պաշտպանության նախարարության շենքի մոտ, փակել են շենքի մուտքերը։

«Ծնողը դռնեդուռ է ընկել, որ մի բան իմանա, դեպքից մեկ ամիս անցել է, ինչ գիտեն մեր երեխեքի հետ կապված»,- բողոքի ակցիայի ժամանակ լրագրողների հետ զրույցում նշեց մահացած զինվորներից մեկի մայրը:

Մեկ այլ ծնող ընդգծեց. «15 երեխու արյունն իրենք չեն մարսելու: Մենք չենք հավատում, ի՞նչ բերին, մեզ տվին, մոխրացած մարմիննե՞ր: Ամեն վայրկյան սպասում ես, որ հեսա դուռը կբացվի երեխեդ կգա, հեռախոսը կզանգի:
Ես հայ մայրերին կոչ եմ անում՝ չթողեք ձեր երեխեքը գնան ծառայելու, որ մեր վիճակում չհայտնվենք»:

Մենք չենք հավատում, որ մերե տղաները հրդեհից են մահացել։ Դա նախօրոք կազմակերպված սպանություն է եղել, հետո նոր վառել են»,- նշեցին մահացած զինծառայողների ծնողները։

Հիշեցնենք՝ հունվարի 19-ին՝ ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երևան՝ Այրվածքաբանության ազգային կենտրոն:

Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը և ևս 7 բարձրաստիճան զինվորականներ։

Հրդեհի դեպքի առնչությամբ նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու և ավելի անձի մահ)։

Մանրամասները՝ տեսանյութում։