16.01.2026 | 19:50
ԱԺ-ն մնացել է առանց ցախավելների, մատակարարը՝ հայտնվել «սև ցուցակում»
Թուրքիայում 78 մարդու են կալանավորել սոցցանցերում երկրաշարժի վերաբերյալ «սադրիչ» գրառումների համար
Քաղաքականություն
16.02.2023 | 14:11
Թուրքիայի ոստիկանությունը ձերբակալել է 78 մարդու, որոնք մեղադրվում են փետրվարի 6-ի ավերիչ երկրաշարժերի վերաբերյալ սոցիալական ցանցերում «սադրիչ» գրառումների միջոցով վախ և խուճապ տարածելու համար։ Նրանցից 20-ի նկատմամբ որպես խափանման միջոց կիրառվել է կալանավումը, գրում է Gercek News-ը։
Թուրքիայի անվտանգության գլխավոր վարչությունը հայտնել է, որ 613 մարդու է նույնականացրել, որոնք մեղադրվում են «սադրիչ գրառումներ անելու համար», 293-ի նկատմամբ քրեական գործ է հարուցվել։ Այս խմբից գլխավոր դատախազը կարգադրել է կալանավորել 78-ին։ Վարչությունը նաև նշել է, որ 46 կայք է փակվել, որոնք փորձել են գողանալ երկրաշարժից տուժածների համար նվիրատվությունները, փակվել է սոցիալական ցանցերի 15 օգտահաշիվ, որոնք ներկայացվել են որպես պաշտոնական հաստատություններ:
Անցյալ հոկտեմբերին Թուրքիայի խորհրդարանն ընդունեց օրենք, որի համաձայն՝ լրագրողները և սոցիալական ցանցերի օգտատերերը կարող են մինչև 3 տարով ազատազրկվել «ապատեղեկատվություն» տարածելու համար։ Սա մտահոգություն էր առաջացրել իրավապաշտպան կազմակերպությունների և եվրոպական տարբեր երկրների շրջանում։
Բացի այդ, Թուրքիայի իշխանություններն անցյալ շաբաթ 12 ժամով արգելափակել էին Twitter-ի հասանելիությունը՝ պատճառաբանելով ապատեղեկատվության տարածումը, ինչն առաջ բերեց ընդդիմադիր քաղաքական գործիչների և մարդկանց զայրույթը, որոնք օգտագործում էին այս հարթակը՝ հարազատներին ու մտերիմներին գտնելու և փրկարարական աշխատանքների մասին տեղեկությունները կիսելու համար:
Էմմա Չոբանյան
