ՔԿՀ-ներում մարդիկ կային՝ տառաճանաչ չէին. ԱՆ-ն մանրամասնեց կրթական ծրագիրը բանտերում

Մեկնարկել է «Իրավական նախաձեռնությունների կենտրոն» ՀԿ-ի կազմակերպած «Կրթությունը քրեակատարողական հիմնարկներում. մարտահրավերներ և հեռանկարներ» թեմայով կոնֆերանսը: Բանախոսները քննարկում են կրթության կարևորությունը, որպես ազատազրկված անձանց վերասոցիալականացման միջոց:

Քրեակատարողական հիմնարկներում 19 տարեկանից բարձր 85 դատապարտյալ ստանում է հանրակրթական կրթություն: Նրանց թիվը սկզբում 92 է եղել, սակայն ընթացքում դուրս են եկել ծրագրերից: Ուսումնասիրությունները ցույց են տվել, որ ազատազրկված 1000 դատապարտյալից 300-ը չեն ստացել հանրակրթական կրթություն կամ ստացած կրթությունը թերի է եղել:

19 տարեկանից բարձր անձանց՝ հանրակրթական իրավունքից օգտվելու ծրագիրը ներդրվել է 2022թ. սեպտեմբերի 1-ից: Կառավարության 2021-2026թթ. գործունեության միջոցառումների ծրագրով նախատեսվել է, որ անկախ տարիքից՝ ազատությունից զրկված անձանց համար հանրակրթությունն իրականացվում է՝ երաշխավորելով ազատությունից զրկված անձանց կրթության իրավունքը: Նպատակը ոչ միայն բուն կրթություն տալն է, այլև ավելի լայն հնարավորությունների ստեղծումը՝ ազատությունից զրկված անձանց սոցիալական հաջող վերաինտեգրումն ապահովելու ուղղությամբ:

Արդարադատության նախարարության գլխավոր մասնագետ Աննա Գյուրջյանը նշեց, որ ոլորտում խնդիրներ կան, չեն թաքցնում և իրենք էլ վեր են հանում դրանք: Գյուրջյանն ասաց, որ ՔԿՀ-ներում դասավանդող ուսուցիչներն ընտրվում են մրցութային կարգով, տարին 3 անգամ վերապատրաստվում են՝ կապված առանձնահատկություններով:

Գյուրջյանի խոսքով՝  դատապարտյալների համար հանրակրթական ծրագիրն իրականացվում է խտացված՝ 1.5 տարվա կտրվածքով: Մասնագետը նշեց, որ կան ազատազրկված անձինք, որոնք նույնիսկ տառաճանաչ չեն եղել: Այդ իսկ պատճառով իրականացվում է կարիքների գնահատում, որպեսզի պարզ լինի դատապարտյալի ակնկալիքը ու կրթության պահանջի բավարարումը:

«Բոլորս էլ հասկանում ենք, որ կրթության շնորհիվ է վերաինտեգրումը հասարակություն: Քրեակատարողական օրենսգիրքն այժմ անցում է կատարել դեպի վերասոցիալականացում։ Ինչն է դրա հիմքը․ բնականաբար կրթությունը, որպեսզի կրկնահանցագործությունները նվազեցնենք»,- հավելեց բանախոսը։

Արդարադատության նախարարության գլխավոր մասնագետը նաև տեղեկացրեց, որ բացի հանրակրթական ծրագրից՝ քրեակատարողական հիմնարկներում իրականացվում են նաև համակարգչային, օտար լեզուների, կարուձևի, կահույքագործության ծրագրեր: Արարատ գյուղում բացվել է պրոբացիայի կենտրոն, որտեղ շահառուները սովորում են նշված հմտությունները: Առաջիկայում նախատեսվում է այլ համայնքներում ևս նման կենտրոններ բացել:

Մանրամասները՝ տեսանյութում։