Բլինքենը Լուիս Բոնոյին նշանակել է Հարավային Կովկասում բանակցությունների հարցերով ավագ խորհրդական

ԱՄՆ պետքարտուղար Էնթոնի Բլինքենը Հարավային Կովկասում բանակցությունների հարցերով նոր խորհրդականի է նշանակել։

«Կովկասյան բանակցությունների գծով ավագ խորհրդական եմ նշանակում Լուիս Բոնոյին։ Այս պաշտոնում պարոն Բոնոն կաշխատի տարածաշրջանի առաջնորդների հետ՝ առաջ մղելու Հայաստանի և Ադրբեջանի միջև խաղաղության գործընթացը և հասցեագրելու Ռուսաստանի կողմից ինքնիշխան Վրաստանի տարածքի շարունակական օկուպացմանը: Պարոն Բոնոն բազմակողմ և երկկողմ հարուստ փորձ է բերում այդ պաշտոնին` ծառայած լինելով որպես Ատոմային էներգիայի միջազգային գործակալությունում և Վիեննայում ՄԱԿ-ի գրասենյակներում ժամանակավոր հավատարմատար, Սուրբ Աթոռում որպես ներկայացուցիչ: Նա նաև ծառայել է որպես Բասրայի տարածաշրջանային գրասենյակի տնօրեն, Ազգային անվտանգության խորհրդում, ինչպես նաև եղել պետքարտուղարի տեղակալի և պետքարտուղարի տնտեսական և բիզնեսի հարցերով տեղակալի խորհրդական»,-ասվում է ԱՄՆ պետքարտուղարության հաղորդագրության մեջ։

Բլինքենը նշում է, որ Միացյալ Նահանգները հանձնառու է օգնել Հայաստանին և Ադրբեջանին բանակցել համապարփակ խաղաղ համաձայնագրի շուրջ, ներառյալ Լեռնային Ղարաբաղի հակամարտության երկարաժամկետ քաղաքական կարգավորման հարցում։

«Պարոն Բոնոն երկկողմանի համագործակցություն է ունենալու համախոհ գործընկերների, այդ թվում՝ Եվրամիության, և միջազգային կազմակերպությունների հետ, ինչպիսին է ԵԱՀԿ-ն՝ նպաստելու Հայաստանի և Ադրբեջանի միջև ուղիղ երկխոսությանը»,-ասվում է հաղորդագրության մեջ։

Էմմա Չոբանյան