16.09.2026 | 11:22
«Արարատ-Արմենիան» մեկնարկում է Եվրոպա լիգայի հիմնական փուլում
Մեկնարկել է «Շիրակի պատմամշակութային ժառանգությունը. հայագիտության արդի հիմնահարցեր» խորագրով միջազգային գիտաժողովը
Մշակույթ
24.09.2022 | 12:00
Գյումրիում մեկնարկել է «Շիրակի պատմամշակութային ժառանգությունը. հայագիտության արդի հիմնահարցեր» խորագրով միջազգային 11-րդ գիտաժողովը: Երկօրյա գիտաժողովը նվիրված է ՀՀ Գիտությունների ազգային ակադեմիայի Շիրակի հայագիտական հետազոտությունների կենտրոնի հիմնադրման 25-ամյակին։
Միջազգային գիտաժողովին ներկայացվում են գիտական հաղորդումներ, որոնք վերաբերում են հայագիտության տարբեր ոլորտների՝ պատմագիտության ու ժողովրդաբանության, ազգաբանության, հնագիտության ու մարդաբանության ճարտարապետության և այլ բնագավառների հիմնախնդիրների։
«1997 թվականին հիմնադրված Շիրակի հայագիտական հետազոտությունների կենտրոնն անցած քառորդ դարում իրականացրել է մի շարք կարևոր ծրագրեր ու հետազոտություններ` մարզի տարածքում նորահայտ հնագիտական հուշարձանների հետազոտություններ, Շիրակ պատմական գավառի հնագույն պատմության մի շարք հիմնախնդիրների ուսումնասիրություններ և այլն: Ստեղծման օրից կենտրոնում հիմնական գիտական ուղղությունները պատմական Շիրակ գավառի ազգագրության, հին ու նոր պատմության, հնագիտության և բանահյուսության խնդիրներն են, նաև էթնո-հոգեբանական և սոցիոլոգիական հետազոտությունները, որ տարվում են մարզի ներկայիս տարածքում»,-«Արմենպրես»-ին տեղեկացրեց Շիրակի հայագիտական հետազոտությունների կենտրոնի տնօրեն Արմեն Հայրապետյանը։
