Հույս ունենք՝ հնարավոր կլինի ապահովել ՌԴ խաղաղապահների անժամկետ առկայությունն Արցախում․ ԱՀ նախագահ․ ՏԵՍԱՆՅՈւԹ

«Ոչ միայն Արցախի Հանրապետությունը, այլ նաև Հայաստանի Հանրապետությունն ունեն և՛ կարճաժամկետ, և՛ երկարաժամկետ անվտանգության ապահովման խնդիր, որը մերօրյա գլխավոր մարտահրավերն է»,- Արցախի անվտանգության ու արտաքին քաղաքականությանն առնչվող հիմնական հարցերի վերաբերյալ իր տեսաուղերձում նշեց Արցախի Հանրապետության նախագահ Արայիկ Հարությունյանը։ Խոսելով Արցախում տեղակայված ռուսա խաղաղապահ զորքերի մասին՝ Հարությունյանն ասաց․

«Ռուսական խաղաղապահների երաշխիքները որոշակի ճեղքման են ենթարկվել, որից օգտվում է Ադրբեջանը: Մյուս կողմից, արտաքին բոլոր թշնամական ուժերը հետևողականորեն ձեռնարկում են ռազմական ու տեղեկատվական բնույթի սադրանքներ՝ ռուս խաղաղապահների դերակատարությունը նսեմացնելու, արցախցիների մոտ Ռուսաստանի հանդեպ անվստահություն ձևավորելու համար: Վստահ եմ, որ արցախցին չի տրվում նման սադրանքներին, որի վառ օրինակը Արցախում ռուս խաղաղապահների նկատմամբ ցուցաբերվող հատուկ վերաբերմունքն է:

Չնայած աշխարհում ու տարածաշրջանում տեղի ունեցող աշխարհաքաղաքական վերադասավորումներին ու առկա մարտահրավերներին, այդուհանդերձ, Ռուսաստանի Դաշնությունը շարունակում է ապահովել Արցախի ժողովրդի անվտանգությունը, թեև այն փխրուն և հարաբերական կայուն է:

Մենք հույս ունենք, որ հնարավոր կլինի բարձրացնել Ռուսաստանի խաղաղապահ առաքելության արդյունավետությունը և ապահովել դրա անժամկետ առկայությունն Արցախում՝ որպես մեր ժողովրդի անվտանգության կարևորագույն երաշխիք՝ անկախ դրա ոչ լիարժեք բնույթից»։

«Ջանք ու եռանդ չենք խնայելու նաև պաշտպանության սեփական համակարգը արդիականացնելու և առկա մարտահրավերներին համապատասխանեցնելու ուղղությամբ։ Հաշվի առնելով թուրք-ադրբեջանական սպառնալիքները, իրավունք ունենք և կարող ենք մտածել նաև ինքնապաշտպանական կարողությունների ու հնարավորությունների մասին»,- նշեց Հարությունյանը։։ Մանրամասները՝ տեսանյութում։

Մանրամասները՝ տեսանյութում։