Քաղաքականություն
14.08.2022 | 23:53
Ավելի քան 40 պետություններ Ռուսաստանին կոչ են արել դուրս բերել զորքերը Զապորոժյեի ատոմակայանի տարածքից և այն փոխանցել Ուկրաինայի վերահսկողության տակ։ Այս մասին ասված է ՄԱԿ-ում ԵՄ պատվիրակության՝ կիրակի օրը տարածած հայտարարության մեջ, փոխանցում է ՏԱՍՍ-ը։
«Ատոմակայաններում ռուսական զորքերի և զենքի տեղակայումն անընդունելի է»,- ասվում է փաստաթղթում, որը ստորագրել են 42 երկրների, այդ թվում՝ ԵՄ անդամ բոլոր երկրների, ԱՄՆ-ի, Մեծ Բրիտանիայի, Ավստրալիայի, Նոր Զելանդիայի, Նորվեգիայի, Ճապոնիայի ներկայացուցիչները և այլն։
Նրանց կարծիքով՝ Ռուսաստանն իր գործողություններով խախտում է անվտանգության սկզբունքները, որոնք պարտավոր են պահպանել Ատոմային էներգիայի միջազգային գործակալության (ՄԱԳԱՏԷ) բոլոր անդամները։
Հայտարարության մեջ ասվում է, որ Ռուսաստանի Դաշնությունը պետք է ատոմակայանի նկատմամբ վերահսկողությունը փոխանցի Կիևին, և միայն այդ դեպքում գործակալության փորձագետները կկարողանան ստուգել կայանը։
Փաստաթուղթը ստորագրած երկրները նույնպես իրենց լիակատար աջակցությունն են հայտնել ՄԱԳԱՏԷ-ի գլխավոր տնօրեն Ռաֆայել Գրոսսիի՝ օբյեկտի անվտանգությունն ապահովելու ջանքերին։
