Թուրքերի շուրջ 70 տոկոսը դժվարությամբ է վճարում սննդի համար․ հետազոտություն

Թուրքիայում մարդկանց ավելի քան 53 տոկոսը չի կարողանում հոգալ իր ամենօրյա ծախսերը, 69,3 տոկոսը դժվարությամբ է վճարում սննդի համար։ Այս մասին ասվում է Yöneylem Social Research ընկերության հետազոտության մեջ, գրում են թուրքական լրատվամիջոցները։

Հարցվածների 60,5 տոկոսն ասել է, որ դժվարանում է վճարել կոմունալ ծառայությունների համար։ Նշվում է, որ հարցումն անցկացվել է հուլիսի 28-ից օգոստոսի 1-ն ընկած ժամանակահատվածում՝ 27 նահանգից 2,400 մարդու շրջանում։

Թուրքիան բախվում է վերջին 24 տարվա ամենաբարձր գնաճին, որը հասել է շուրջ 80 տոկոսի, լիրան էլ շարունակում է արժեզրկվել։

Yöneylem-ի կողմից հարցվածների մոտ 69 տոկոսն ասել է, որ իրենց եկամուտը նվազել է կտրուկ գնաճի պատճառով, իսկ 65 տոկոսն ասել է, որ իրենց ֆինանսական դժվարությունները դեպրեսիա են առաջացրել։

Մասնակիցների ընդհանուր 66,9 տոկոսը նշել է, որ երկրի տնտեսական ճգնաժամը և արտադրության բացակայությունը Թուրքիայի ամենակարևոր խնդիրներն են։ Եվս 28 տոկոսը երկրի ամենամեծ խնդիրներից է անվանել «գնաճը», «կյանքի բարձր արժեքը» և «ֆինանսական դժվարությունները» (28,1 տոկոս)։

Այս խնդիրներին, համապատասխանաբար, 13,1, 11,6 և 10,4 տոկոսով հաջորդում են կրթության համակարգի, արդարության բացակայության, դատարանների անօրինական որոշումների և սիրիացի ու աֆղան փախստականների խնդիրները։

Հարցին, թե ով է պատասխանատու Թուրքիայի տնտեսության ներկա վիճակի համար, 50,5 տոկոսը պատասխանել է՝ Թուրքիայի նախագահ Ռեջեփ Թայիփ Էրդողանը, 15,1-ն էլ նշել է՝ ֆինանսների նախարարը և տնտեսական բյուրոկրատիան։

Էմմա Չոբանյան