Քաղաքականություն
05.08.2022 | 23:30
Թուրքիայի նավահանգիստների պահեստները լցված են Ռուսաստան ուղևորվող ապրանքներով։ Այս մասին հայտնում է թուրքական Dunya պարբերականը՝ վկայակոչելով իր աղբյուրներին, փոխանցում է «Ահվալ» գործակալությունը։
Թուրքիան դարձել է ռուսական ապրանքների ներմուծման տարանցիկ հանգույց՝ Արևմուտքի կողմից ՌԴ-ի դեմ պատժամիջոցների սահմանումից հետո։ Նշվում է, որ աշխարհի երկրներից ժամանող բեռները բեռնաթափվում են թուրքական նավահանգիստներում և տեղափոխվում Ռուսաստան մեկնող թուրքական նավեր՝ «Էմբարգոյի զննումից» հետո։ Ապրանքներն ուղարկվում են առանց գրանցման։
Որոշ ռուսական ընկերություններ գրասենյակներ են բացում Թուրքիայում և համագործակցում են՝ առևտուրն իրականացնելու համար։ Լրատվամիջոցը գրում է, որ ռուս գործարարները գնում են անշարժ գույք և հիմնում տեղական ընկերություններ՝ Թուրքիայի քաղաքացիություն ստանալու համար, այնուհետև Եվրամիությունից և Հեռավոր Արևելքից արտադրանքը Ռուսաստան են ուղարկում՝ Թուրքիայում իրենց նոր գրասենյակի հասցեի միջոցով։
Բեռնափոխադրումները հաճախ իրականացվում են թուրքական ընկերությունների կողմից, հիմնականում՝ ծովով, քանի որ համաշխարհային հսկաները, ինչպիսիք են Maersk-ը, Hapag Lloyd-ը և Hamburg Süd-ը, դադարեցրել են ապրանքների տեղափոխումը Ռուսաստան: Օգտագործվում են նաև ցամաքային, օդային և երկաթուղային երթուղիները։
«Անցյալ շաբաթ ես Մերսինի նավահանգստում էի: Ամբողջ աշխարհից եկող և Ռուսաստան տեղափոխվող բեռների պատճառով Մերսինի պահեստները լիքն են։ Որոշ դեպքերում դրանք ուղարկվում են Ռուսաստան թուրքերին պատկանող նավերով, որոշ դեպքերում ռուսներն են գալիս Թուրքիա այդ ապրանքների փոխադրման համար»,- ասել է Rif Line-ի Թուրքիայի գլխավոր տնօրեն Մեհմեդ Սերքան Էրդեմը։
Medkon Shippingն էլ՝ Թուրքիայի խոշոր նավերի սեփականատերերից մեկը, վերջին շաբաթների ընթացքում սկսել է նոր երթուղի դեպի ռուսական Նովոռոսիյսկ նավահանգիստ Մերսինից, Ստամբուլից և Իզմիրից։
Ընկերության գլխավոր տնօրեն Մահմուտ Իշըքն ասել է, որ շատ զգույշ են ՌԴ-ի դեմ կիրառված պատժամիջոցների ու էմբարգոյի հարցում՝ ստուգելով, որ փոխադրողն ու ստացողը չներառվեն պատժամիջոցների ցանկում։
«Մեզ համար բավական է, որ ուղարկողը, ստացողը և բեռը չենթարկվեն էմբարգոյի։ Սակայն եթե նույնիսկ լինի փոքր հարցական, մենք փոխադրում չենք իրականացնի»,- ասել է նա։
Էմմա Չոբանյան
