Քաղաքականություն
05.08.2022 | 18:29
G20-ի շատ երկրներ չեն աջակցում ուկրաինական պատերազմի պատճառով Ռուսաստանի դեմ լայնածավալ պատժամիջոցներին։ Արևմտյան բարձրաստիճան պաշտոնյաները, որոնք հանդես էին գալիս Ռուսաստանի կոշտ տնտեսական շրջափակման օգտին, զարմացած են G20-ի շատ երկրների կողմից աջակցության բացակայությունից, գրում է Bloomberg-ը։
Ամենամեծ միջազգային խաղացողը, որը չի աջակցում Ռուսաստանի նկատմամբ տնտեսական ճնշմանը, Չինաստանն է, նշում է թերթը։ Մոսկվային աջակցում են նաև Հնդկաստանը, Բրազիլիան, Հարավային Աֆրիկան և Թուրքիան։ Միասնական դիրքորոշման բացակայությունը բարդացնում է Ռուսաստանի դեմ գլոբալ միջոցների կիրառումը։
The Washington Post-ը, վկայակոչելով ուկրաինական հետախուզության տվյալները, հայտնել է, որ Ռուսաստանը հույս ունի Թուրքիայի օգնությամբ շրջանցել պատժամիջոցները։ Ըստ պարբերականի՝ այդ մասին է վկայում Մոսկվայի առաջարկը, որը գաղտնալսվել է ուկրաինական հետախուզության կողմից Վլադիմիր Պուտինի և Ռեջեփ Թայիփ Էրդողանի՝ Սոչիում մեկնարկած հանդիպումից առաջ։ Համաձայն գաղտնալսման՝ ռուսական կողմը խնդրում է թույլ տալ մասնաբաժիններ գնել թուրքական նավթավերամշակման գործարաններում, նավթային տերմինալներում և պահեստարաններում: Դա կարող է օգնել թաքցնելու նավթի իրական ծագումը և շրջանցել պատժամիջոցները՝ մասնավորապես, ԵՄ կողմից սահմանված նավթի մասնակի էմբարգոն։
Տաթև Ֆռանգյան
