28.04.2025 | 18:27
Դեսպան Վահագն Աֆյանը հավատարմագրերն է հանձնել Բանգլադեշի նախագահին
Բաքուն Մոսկվային միջազգային ատյաններով է սպառնում՝ պնդելով, որ ադրբեջանական օդանավը խոցվել է ՌԴ-ի կողմից Սիրիայից բերված «Պանցիր»-ով
Քաղաքականություն
24.01.2025 | 20:13
Ադրբեջանական իշխանամերձ Caliber.Az-ը նոր տեղեկություններ է հաղորդում Ակտաուի մերձակայքում ադրբեջանական օդանավի կործանումից։ Նշվում է, որ «Ադրբեջանական ավիաուղիների» ինքնաթիռի կործանման դեպքի առթիվ Ռուսաստանում անցկացված քրեական գործի հետաքննությունը հաստատել է, որ ինքնաթիռը խոցվել է «Պանցիր Ս-1» հակաօդային պաշտպանության համակարգով։
Այս համակարգը Ռուսաստան է տարվել Սիրիայից։ Նաև, ըստ հրապարակման, ռուսական հետաքննությունը հաստատել է ադրբեջանական ինքնաթիռի դեմ ռադիոէլեկտրոնային համակարգերի կիրառումը, ինչի հետևանքով օդանավի կառավարման համակարգն անջատվել է։
«Ռուսաստանում հետաքննությունը պարզել է ոչ միայն քաղաքացիական ինքնաթիռի վրա կրակ բացած անձին, այլև հրաման տվողին։ Ավելին, մեր խմբագրությունն արդեն գիտի այդ մարդկանց անուններն ու կոչումները, և մենք անպայման կկիսվենք այս տեղեկատվությամբ ընթերցողների հետ ճիշտ ժամանակին։ Միևնույն ժամանակ, մենք դիմում ենք Կրեմլի պաշտոնյաներին. վստա՛հ եղեք, մեզ արդեն հայտնի է ողբերգության անմիջական պատասխանատու զինվորականների անուններն ու կոչումները։ Իհարկե, դուք կարող եք շարունակել հավատարիմ մնալ ճշմարտությունը թաքցնելու գծին՝ դառնալով հանցագործության մեղսակից։ Կամ դուք կարող եք անել պատվաբեր գործ՝ չձգձգել գործընթացը և ընդունել ողբերգության պատասխանատվությունը»,- ասվում է հրապարակման մեջ։
Փաստորեն, Բաքուն Մոսկվային ևս մեկ անգամ կոչ է անում ընդունել մեղքն ու պաստասխանատվություն ստանձնել՝ հիշեցնելով, թե Ադրբեջանն Արցախում 2023 թվականի սեպտեմբերին ռուս խաղաղախահների սպանության ու 2020 թվականի նոյեմբերի 9-ին ռուսական ուղղաթիռի խոցման համար ներողություն է խնդրել ու, իբր, մեղավորներին պատասխանատվության ենթարկել, ինչի փաստացի ապացույցներ, սակայն, չկան։
ՌԴ-ի կողմից օդանավի կործանման մեղքը չընդունելու դեպքում Բաքուն սպառնում է դիմել միջազգային ատյաններին։
«Իրազեկ աղբյուրները մեզ հայտնեցին, որ եթե Ռուսաստանը փորձի փակել գործը և չհրապարակի հետաքննության արդյունքները, Ադրբեջանը կդիմի միջազգային իրավական մարմիններին։ Ավելին, ադրբեջանա-ռուսական հարաբերություններում բեկումնային կետ կդառնա պատասխանատվությունն ընդունելուց հրաժարվելը՝ դրանից բխող բոլոր հետևանքներով»,- գրում է ադրբեջանական իշխանամերձ լրատվամիջոցը՝ հավելելով, թե Ռուսաստանին մնացել են մի քանի բարեկամ պետություններ, և Մոսկվան կարող է կորցնել ևս մեկին, այս անգամ՝ Ադրբեջանին։
Հիշեցնենք, որ Ղազախստանի փոխվարչապետ Կանատ Բոզումբաևն այսօր հայտնել է, որ երկրի Տրանսպորտի նախարարությունը հաջորդ շաբաթ կարող է հրապարակել Ակտաու քաղաքի մերձակայքում ադրբեջանական AZAL-ի օդանավի կործանման հետաքննության նախնական արդյունքները։
Թարգմանությունը՝ Էմմա Չոբանյանի
