Ղազախստանը կարող է հաջորդ շաբաթ հրապարակել ադրբեջանական կործանված օդանավի հետաքննության նախնական արդյունքները

Ղազախստանի Տրանսպորտի նախարարությունը հաջորդ շաբաթ կարող է հրապարակել Ակտաու քաղաքի մերձակայքում ադրբեջանական AZAL-ի օդանավի կործանման հետաքննության նախնական արդյունքները։ Այս մասին հայտարարել է Ղազախստանի փոխվարչապետ Կանատ Բոզումբաևը, գրում է Ինտերֆաքսը։

«Հուսով ենք, որ հաջորդ շաբաթ հետաքննության նախնական մասը կհրապարակվի Տրանսպորտի նախարարության կողմից՝ ավիավթարի օրվանից 30 օրվա ընթացքում, ինչպես խորհուրդ է տալիս ICAO-ն: Կան դժվարություններ, բայց մենք պետք է տեղավորվենք»,- ասել է Բոզումբաևը ճեպազրույցի ընթացքում։

Նա ընդգծել է, որ խոսքն ավիացիոն իշխանությունների կողմից բուն ավիավթարի հետաքննության մասին է։

«Գիտեք, որ հանձնաժողովն աշխատում է, մոտ 17-18 հոգի՝ Ռուսաստանից, Ադրբեջանից, ICAO-ից, Բրազիլիայից և այլ երկրներից փորձագետների մասնակցությամբ։ Հիմա նրանք կենտրոնացած են Բրազիլիայում սև արկղերի վերծանված նյութերի աշխատանքի վրա։ Թռիչքի ռեժիմները, ձայնային կապը գետնի հետ, հենց անձնակազմի միջև վերադրվում են, և որոշակի եզրակացություններ կարվեն»,- ասել է Ղազախստանի փոխվարչապետը։

Խոսելով քրեական գործի մասին՝ Բոզումբաևն ասել է, որ երկրի Գլխավոր դատախազությունը հետաքննություն է անցկացնում, կատարվում են փորձաքննություններ։

«Սա մի փոքր այլ ոլորտ է, մենք՝ քաղաքացիական իշխանություններս, այդտեղ չենք խառնվում, իրենք էլ պետք է ժամանակին ներկայացնեն։ Նույնը տեղի է ունենում Ռուսաստանում և Ադրբեջանում, և մեր ուժայինները, որոնք քրեական հետախուզություն են իրականացնում, սերտ կապի մեջ են Ռուսաստանի Դաշնության և Ադրբեջանի դատախազությունների հետ, մեր ավիացիոն իշխանությունները նույնպես սերտ կապի մեջ են երկու երկրների հետ»,- ասել է նա։

Ադրբեջանական լրատվամիջոցների փոխանցմամբ՝ Ղազախստանի փոխվարչապետը նաև հայտարարել է, որ օդաչուների խոսակցությունների վերծանումների համացանցում հրապարակված նյութերը տարբերվում են կործանված օդանավի «սև արկղերի» նյութերից։

«Սև արկղերի պարունակությունից մեծ տարբերություն կա։ Սպասեք պաշտոնական աղբյուրներին», ասել է Բոզումբաևը՝ նշելով, որ Ղազախստանն Ադրբեջանին և Ռուսաստանին է փոխանցել  ադրբեջանական օդանավի «սև արկղերի» վերծանումների պատճենները։

Հիշեցնենք, որ ավելի վաղ ռուսական «Baza» տելեգրամյան ալիքը հրապարակել էր, ըստ պնդման՝ «Ադրբեջանական ավիաուղիների» կործանված օդանավի և Գրոզնիի, Դոնի Ռոստովի ու Ակտաուի ավիադիսպետչերների հետ խոսակցությունների ամբողջական սղագրությունը։

Թարգմանությունը՝ Էմմա Չոբանյանի