14.03.2026 | 11:11
Հրդեհաշիջման հատուկ տակտիկական ուսումնավարժություն՝ առևտրաժամանցային կենտրոններից մեկում
Ադրբեջանում բանտարկված ընդդիմադիր կին լրագրողներն ահազանգում են՝ մեկուսարանում բռնության են ենթարկվել
Քաղաքականություն
24.01.2025 | 20:29
Բաքվի թիվ 1 քննչական մեկուսարանում պահվող ընդդիմադիր Abzas Media լրատվամիջոցի խմբագիր Սևինջ Վագիֆքըզին հայտնել է գործընկեր լրագրողների նկատմամբ բռնության, ֆիզիկական ճնշումների և աշխատակիցների կողմից նրանց նկատմամբ իրականացվող խտրականության մասին։ Հարազատների հետ հեռախոսազրույցում նա հայտնել է, որ բռնության է ենթարկվել իր գործընկեր Էլնարա Գասիմովային բարևելու փորձի համար, գրում են ադրբեջանական լրատվամիջոցները։
Երբ Վագիֆքըզիին տարել են հեռախոսազրույցի, նա ցանկացել է խցի պատուհանից ողջունել Էլնարա Գասիմովային։ Այդ պահին Այգուլ Բաբաևա անունով հսկիչն ամուր բռնել է լրագրողի թևից, նրան սեղմել պատին։
Մյուս բանտարկյալներին նման շփումն արգելված չէ, սակայն կին լրագրողները խտրականության են ենթարկվում, վստահեցնում է Վագիֆքըզին։
Լրագրողների բողոքներին ի պատասխան՝ հսկիչը հայտարարել է, որ «ուրիշները կարող են, իսկ դուք՝ ոչ»։
«Սա իմ նկատմամբ իրականացվող բռնություն է։ Ձեռքս սեղմում են, գոռում են ինձ վրա»,- լրագրողի խոսքերն են փոխանցել հարազատները։
Վագիֆգիզին, Գասիմովան և Նարգիզ Աբսալամովան նախկինում ևս բողոքել էին մեկուսարանի հսկիչների ֆիզիկական ճնշումներից։
Հավելենք, որ Abzas Media-ի գործով, որը հիմնականում զբաղվում է Ադրբեջանի իշխանությունների կոռուպցիոն գործարքների հետաքննությամբ, կալանավորված են վեց լրագրողներ՝ տնօրեն Ուլվի Հասանլին, փոխտնօրեն Մուհամմադ Կեկալովը, գլխավոր խմբագիր Սևինջ Վագիֆքըզին, լրագրող Նարգիզ Աբսալամովան և հետաքննող լրագրող Հաֆիզ Բաբալին, լրագրող Էլնարա Գասիմովան, տնտեսագետ Ֆարիդ Մեհրալիզադեն։ Նրանց մեղադրանք է առաջադրվել Ադրբեջանի Քրեական օրենսգրքի յոթ հոդվածներով (մաքսանենգություն, որը կատարվել է կազմակերպված խմբի կողմից, ապօրինի ձեռնարկատիրություն, դիտավորությամբ կեղծ փաստաթղթերի օգտագործում, հարկերից խուսափել և այլն): Այս հոդվածները նախատեսում են մինչև 12 տարի ազատազրկում։ Լրագրողներից որևէ մեկն առաջադրված մեղադրանքը չի ընդունում։ Նրանք հայտարարում են, որ լրատվամիջոցին ու իրենց պատժում են մասնագիտական գործունեության համար։
Ի դեպ, Վագիֆքըզին անցյալ տարվա դեկտեմբերին ԱՄՆ-ի կողմից կոռուպցիայի դեմ պայքարում համար Anticorruption Champions Awards մրցանակով է պարգևատրվել։
Թարգմանությունը՝ Էմմա Չոբանյանի
