Ընդդիմադիր պատգամավորներին մանդատներից զրկելու հարցում ՔՊ-ում միասնական որոշում չկա. ՏԵՍԱՆՅՈւԹ

Երեկ ԱԺ իշխող «Քաղաքացիական պայմանագիր» խմբակցության փակ նիստում քննարկվել է Փաշինյանի հրաժարականի պահանջով ակցիաներն առաջնորդող ընդդիմադիր պատգամավորներ Իշխան Սաղաթելյանին, Արթուր Վանեցյանին ու մյուսներին մանդատներից զրկելու և խորհրդարանական պաշտոններում նրանց անվստահություն հայտնելու հարցը։

Խմբակցության պատգամավորներից մեկն անանուն մնալու պայմանով Factor TV-ին փոխանցեց, որ իշխանափոխության պահանջով փողոց դուրս եկած և նիստերից բացակայող պատգամավորներին մանդատներից ու պաշտոններից զրկելու հարցում միասնական մոտեցում չկա: Ըստ մեր զրուցակցի՝ ՔՊ-ում ժողովրդավարական հայացքներով աչքի ընկնող պատգամավորները գործընկերների մոտեցումը ծայրահեղական են համարել, նաև մատնանշել հնարավոր միջազգային աղմուկը: Մյուսներն էլ բերել են այն հիմնավորումը, թե պատգամավորներին մանդատներից զրկելուց հետո, միևնույն է, նրանց կուսակիցներն են խորհրդարան գալու:

Ընդդիմադիրներին մանդատներից զրկելու կողմնակիցներից է եղել Հովիկ Աղազարյանը: Նա այսօր չցանկացավ հարցազրույց տալ, սակայն այս տեղեկությունը չհերքեց: Իսկ ահա նիստին ներկա մյուս պատգամավորները խուսափեցին ուղիղ պատասխաններ հնչեցնել:

Ավելի վաղ հայտնել էինք, որ անհարգելի բացակայությունների շեմը հատել են Արթուր Վանեցյանը, Իշխան Սաղաթելյանը, Արմեն Ռուստամյանը, Գեղամ Մանուկյանը, Արթուր Ղազինյանը, Լիլիթ Գալստյանը, Վահե Հակոբյանը, Ասպրամ Կրպեյանը:

Այդուհանդերձ, նշենք, որ ՔՊ խմբակցության պատգամավորները «Հայաստան» և «Պատիվ ունեմ» խմբակցության բացակայող պատգամավորներին մանդատներից զրկելու լիազորություն չունեն: Սահմանադրության 98-րդ հոդվածի 2-րդ մասի համաձայն՝ պատգամավորի լիազորությունները դադարեցվում են վեց ամսվա ընթացքում քվեարկությունների առնվազն կեսին անհարգելի բացակայելու, ինչպես նաև Սահմանադրության 95-րդ հոդվածի պահանջները խախտելու դեպքերում: Պատգամավորական լիազորությունների դադարեցման համար պետք է լինեն նաև «ԱԺ կանոնակարգ» սահմանադրական օրենքի հիմքերը:

Չնայած իշխանականները քննարկման առարկա են դարձրել իրենց քաղաքական ղեկավարի հրաժարականը պահանջողներին մանդատներից ու խորհրդարանական պաշտոններից զրկելու հարցը, սակայն նկատենք, որ օրենսդրությունը ՔՊ-ականներին այս հարցը պաշտնապես քննարկելու հնարավորություն ընձեռում է միայն հուլիսի 1-ից սկսած:

«Պատիվ ունեմ» խմբակցության քարտուղար Հայկ Մամիջանյանը նշում է՝ ո՛չ ՔՊ-ականների նիստը, ո՛չ էլ նիստում քննարկված հարցը իրեն ու թիմակիցներին չի անհանգստացնում:

Իշխանությունն ընդդիմադիրներին քննադատում է նաև նիստերին չգալով աշխատավարձ ստանալու համար: ՔՊ-ական պատգամավոր Բաբկեն Թունյանն ավելի վաղ հայտարարել էր, որ իր հաշվարկներով՝ ընդդիմությունը միայն մայիս ամսվա համար ընդհանուր 25 մլն դրամ աշխատավարձ ու պատգամավորական ծախսերի գումար է ստացել:

Նշենք, որ բացակայությունների համար ամենաշատ գումարը պահվել է «Հայաստան» խմբակցության պատգամավոր Արթուր Խաչատրյանի աշխատավարձից՝ 280 հազար դրամ, Իշխան Սաղաթելյանի աշխատավարձից` 265 հազար դրամ, Արթուր Վանեցյանից՝ 200 հազար դրամ, իսկ մյուս պատգամավորներից պահվել է 150 հազարական դրամ:

Մանրամասները՝ տեսանյութում։

Նարեկ Կիրակոսյան