13.01.2026 | 18:20
ԵՄ-ն խոստանում է պատժամիջոցներ կիրառել Իրանի նկատմամբ «սարսափելի զոհերի պատճառով»
Թուրքիայի ընդդիմությունը հայտարարել է արտահերթ ընտրությունների, Ստամբուլի քաղաքապետի ազատ արձակման համար ավելի քան 10 մլն ստորագրություն հավաքելու մասին
Քաղաքականություն
14.04.2025 | 23:30
Թուրքիայի գլխավոր ընդդիմադիր Ժողովրդահանրապետական կուսակցությունը (CHP) նախօրեին առաջին հանրահավաքն է անցկացրել Սամսունում՝ կուսակցության նախագահի թեկնածու, Ստամբուլի քաղաքապետ Էքրեմ Իմամօղլուի ձերբակալությունից հետո արտահերթ ընտրությունների պահանջի շրջանակում։ Ընթերցվել է նաև Իմամօղլուի նամակը, որից հետո ելույթով է հանդես եկել կուսակցության նախագահ Օզգյուր Օզելը, գրում է Cumhuriyet-ը։
«Ով փորձել է ազգի կամքին հակառակ ինչ-որ բան անել, միշտ հիասթափություն է ապրել։ Այսօր նրանք, ովքեր իրենց իշխանությունը չեն ստանում ազգից, նրանք, ովքեր նայում են ոչ թե ազգին, այլ մյուս երկրներին, մյուս մայրցամաքներին և օվկիանոսի մյուս առաջնորդներին, դատապարտված են պարտության։ Մենք հույսը դնում ենք ազգի վրա, այլ ոչ թե Ամերիկայի վրա։ Մենք իշխանությունը ստանում ենք ժողովրդից, այլ ոչ թե Թրամփից»,- հայտարարել է Օզելը։
Նա իշխանություններին կրկին արտահերթ ընտրությունների կոչ է արել։
«Մարդկանց քվեատուփեր են պետք։ Երկիրն այլևս չի ուզում մի բռնակալի, որը թոշակառուներին թողնում է քաղցած, նվազագույն աշխատավարձ ստացողներին տառապանքի է մատնում, երիտասարդներին թողնում է գործազուրկ, զրկում նրանց ապագայի հույսից և հրաժարվում է ժողովրդավարական դիմադրությունից, որից նա հեռացել էր, երբ հասկացել է, որ չի կարող հաղթել ընտրություններում, փախչում է քվեատուփից և վախենում է քվեատուփից։ Ժողովուրդը, դեմոկրատները ընտրություններ են ուզում»,- նշել է ընդդիմադիր կուսակցապետը։
Բացի այդ, Օզելը երկրի նախագահ Ռեջեփ Թայիփ Էրդողանին կրկին խունտայի անդամ է անվանել․ «Ես ասացի, որ նա հեղաշրջման կազմակերպիչ է, խունտայի անդամ։ Նա անընդհատ դեմ է դրան։ Աշխարհում կան երկու տեսակի հեղաշրջումներ։ Մեկը ռազմական հեղաշրջումն է, մյուսը՝ քաղաքացիականը։ Երկուսն էլ ունեն ծրագիր, որը գլխավորում է խունտան։ Մարտի 19-ին Թուրքիայում տեղի ունեցավ քաղաքացիական հեղաշրջում, և պալատը դարձավ հեղաշրջումը գլխավորող խունտայի շտաբը»։
Օզլեը նշել է, որ «կփրկեն Թուրքիայի Հանրապետությունը այդ խունտայից, կառավարությունից, որը պետությունը ղեկավարում է ինչպես հանցավոր կազմակերպություն, առաջին քվեատուփով»։
Ընդդիմության առաջնորդը նաև հայտնել է, որ Էքրեմ Իմամօղլուին ազատ արձակելու, նախագահի պաշտոնում նրա թեկնածության առաջադրման և արտահերթ ընտրությունների անցկացման արշավի շրջանակում հավաքվել է ավելի քան 10 մլն ստորագրություն։
«Երեկ ժամը 17:00-ին մեր կողմից անցկացված հաշվարկի արդյունքների համաձայն՝ 10 միլիոն ստորագրության շեմը հատվել է։ Այնուամենայնիվ, մեր նպատակը մեծ է, մեր ճանապարհը երկար է, բոլորս միասին կաշխատենք՝ մինչև ստանանք ընտրողների կեսից ավելին»,- հայտարարել է Օզելը։
Թուրքիայում ստորագրահավաքի արշավը մեկնարկել է մարտի 30-ին Տրապիզոն նահանգում, որտեղ ծնվել է Ստամբուլի կալանավորված քաղաքապետ Էքրեմ Իմամօղլուն։
Թարգմանությունը՝ Էմմա Չոբանյանի
