21.12.2025 | 18:21
Իրավիճակը ՀՀ ավտոճանապարհներին՝ 17։30-ի դրությամբ
Բրիտանական Anglo Asian Mining-ը նախատեսում է 2022թ․ 4-րդ եռամսյակում Արցախի գրավյալ Վեժնալիի ոսկու հանքի արդյունահանում սկսել
Քաղաքականություն
18.05.2022 | 22:41
Բրիտանական Anglo Asian Mining ընկերությունը նախատեսում է 2022 թվականի չորրորդ եռամսյակում երկու նոր հանքավայրերից ոսկու արդյունահանում իրականացնել, որից մեկը գտնվում է Արցախի գրավյալ տարածքներում։ Ադրբեջանական լրատվամիջոցների հաղորդմամբ՝ այս մասին ասվում է ընկերության տարածած հաղորդագրությունում։
«2022 թվականի մարտին մենք հայտարարեցինք Գոշի հանքավայրից հարավ նոր՝ Հասան ոսկու երակի հայտնաբերման մասին: Այստեղ հանքաքարում ոսկու պարունակությունը մեկ տոննայի դիմաց գնահատվում է 229,5 գրամ։ Ներկայում մենք գնահատում ենք Հասան երակի ներուժը և մշակում արտադրական պլան, որը նախատեսում ենք սկսել այս տարվա չորրորդ եռամսյակի սկզբին»,- ասվում է հայտարարության մեջ։
Բացի այդ, ընկերությունը հայտնում է, որ 2022 թվականի չորրորդ եռամսյակի սկզբին մտադիր է արդյունահանել Արցախի գրավյալ Կովսականի (Զանգելան) Վեժնալիի հանքավայրը։ Այն Արցախյան 44-օրյա պատերազմից հետո անցել է ադրբեջանական վերահսկողության տակ։
«Վեժնալի մուտքը ստացվել է 2021 թվականի վերջին, և հիմա հանքավայրը շահագործման համար անվտանգ է։ Այստեղ գտնվում է ավելի վաղ աշխատող ստորգետնյա հանք։ Մենք արդեն իրավունք ենք ստացել սեփականության ենթակառուցվածների իրականացման, այդ թվում՝ փոքր վերամշակման գործարանի։ Ներկայում ընկերության թիմը Վեժնալիում է, և մեր գործունեությունը թափ է հավաքում, որպեսզի արտադրությունը սկսենք 2022 թվականի չորրորդ եռամսյակի սկզբին»,- ասվում է հայտարարության մեջ։
Հավելենք, որ բրիտանական ընկերության և Ադրբեջանի կառավարության միջև պայմանագիր է ստորագրվել 1997 թվականին, որը նախատեսում է 6 հանքավայրերի շահագործում, որոնց թվում են նաև Արցախի հանքերը։
Ավելի վաղ էլ բրիտանական Anglo Asian Mining-ը հայտարարել էր, որ Ադրբեջանի հետ պայմանագիր է կնքել նոր հանքավայրերի մշակման համար, որը ընկերությանը հնարավորություն է տալիս շահագործել երեք նոր հանք՝ 882 քառակուսի կմ ընդհանուր տարածքով։
Նոր պայմանագրի համաձայն՝ ընկերությունը հրաժարվում է Արցախի գրավյալ Քարվաճառի շրջանում գտնվող Սոթքի ոսկու հանքավայրի պայմանագրային տարածքի իրավունքից։ Բացի այդ, ընկերությունը նաև հույս է հայտնել, որ կկարողանա շահագործել Արցախի՝ հայկական վերահսկողության տակ գտնվող հանքերը։
«Ադրբեջանի կառավարությունը բոլոր ջանքերը կգործադրի Գազիլբուլագի (Դրմբոն) և Դեմիրլիի (Կաշեն) պայմանագրային տարածքներ ֆիզիկական մուտք ապահովելու համար»,- ասվում էր ընկերության հայտարարության մեջ։ Այս հանքերը գտնվում են հայկական վերահսկողության տակ։
Էմմա Չոբանյան
